ოცნების ხელისუფლების საგარეო საქმეთა მინისტრმა მაკა ბოჭორიშვილმა, დიპლომატიის დღისადმი მიძღვნილი ღონისძიების შემდეგ, ჟურნალისტებთან საუბრისას თქვა, რომ "საქართველოში არავინ ლანძღავს და არავინ ესხმის თავს უცხოელ დიპლომატებს".

მისივე თქმით, ქართული ოცნება რჩება მეგობრების რეჟიმში მის პარტნიორებთან

"საქართველოში არავინ ლანძღავს და არავინ ესხმის თავს უცხოელ დიპლომატებს. პირიქით, ჩვენ ძალიან დიდ პატივს ვცემთ იმ ურთიერთობებს, რა ურთიერთობებიც საქართველოს აქვს წლების განმავლობაში განვითარებული ჩვენს პარტნიორებთან, ჩვენს მეგობრებთან და არაერთხელ ხაზგასმით გვითქვამს, მიუხედავად იმ გამოწვევებისა, რომლის წინაშეც დღეს დგას საქართველო, მიუხედავად, პირიქით, იმ თავდასხმებისა, რომელსაც ჩვენ ვხედავთ ქართულ სახელმწიფოზე, ქართულ დემოკრატიაზე, ჩვენ ვრჩებით მეგობრების რეჟიმში ჩვენს პარტნიორებთან, რაც სჭირდება ჩვენი ქვეყნის მომავალს", — თქვა "ოცნების" ხელისუფლების საგარეო საქმეთა მინისტრმა მაკა ბოჭორიშვილმა.