"კორუფციის ყველა ხვრელი უნდა ჩაიკეტოს", — ამის შესახებ ოცნების პარლამენტის თავმჯდომარემ, შალვა პაპუაშვილმა ჟურნალისტებთან საუბრისას თქვა.

მისი თქმით, "ყველა, ვისაც კორუფციაზე ხელი წაუცდება, უნდა გამოვლინდეს".

"როდესაც ირაკლი კობახიძე ავირჩიეთ პრემიერმინისტრად, ზუსტად მაშინ ითქვა, რა იქნებოდა მთავრობის ძირითადი მიმართულებები და სტრატეგია. ერთ-ერთი მთავარი მიმართულება არის კორუფციის წინააღმდეგ ბრძოლა. დღეს, საქართველო რეგიონში არის ლიდერი კორუფციის სიმცირის გამო, თუმცა ჩვენი მიზანი არის, რომ ჩვენ ვიყოთ საუკეთესო სამეულში კორუფციის სიმცირის გამო. ამიტომ, კორუფციის ყველა ხვრელი უნდა ჩაიკეტოს. ყველა, ვისაც კორუფციაზე ხელი წაუცდება, უნდა გამოვლინდეს. იმედი მაქვს, ამაში მაინც დამეთანხმებით, რომ სუს-ი, შსს, პროკურატურა, ფინანსთა სამინისტროს საგამოძიებო უწყება — ყველა ის სტრუქტურა, რომელიც ჩართულია კორუფციის წინააღმდეგ ბრძოლაში, არავის ხელს არ აფარებს. არ არსებობს ავტორიტეტი, რომელსაც ისინი მოერიდებიან", — განაცხადა ოცნების პარლამენტის თავმჯდომარემ, შალვა პაპუაშვილმა.