დიდი ოდენობით უკანონო შემოსავლის ლეგალიზაციის ფაქტზე, "კრისტალ ჯგუფის" ხელმძღვანელი ვლადიმერ სტეფანიანი გუშინ, 7 ნოემბერს, დააკავეს.

ფინანსთა სამინისტროს საგამოძიებო სამსახურის ცნობით, ბრალდებულმა "ბორჯომის მუნიციპალიტეტის დაბა ბაკურიანში, დიდველის ტერიტორიაზე, შესაბამისი ნებართვის გარეშე, თვითნებურად ააშენა ხუთი სასტუმრო-აპარტამენტი, მოაწყო კერძო საბაგირო, კერძო სათხილამურო ტრასა და ტობოგანი, რომლის გამოყენების შესაძლებლობაც ჰქონდა მხოლოდ კრისტალ ჯგუფის მომხმარებლებს." განცხადებაში ასევე წერია, რომ ამ ქმედებით უკანონოდ მიღებულმა შემოსავალმა რამდენიმე ათეული მილიონი ლარი შეადგინა.

"საქმეზე ჩატარებული გამოძიებით დგინდება, რომ "კრისტალ ჯგუფის" კომერციული დასახელების ქვეშ გაერთიანებული შპს "ბაკურიანი ბიზნეს ჯგუფის" და შპს "ჰოტელს მენეჯმენტ გრუპის" დამფუძნებელმა პირმა ბორჯომის მუნიციპალიტეტის დაბა ბაკურიანში, დიდველის ტერიტორიაზე, შესაბამისი ნებართვის გარეშე, თვითნებურად ააშენა ხუთი სასტუმრო-აპარტამენტი, მოაწყო კერძო საბაგირო, კერძო სათხილამურო ტრასა და ტობოგანი, რომლის გამოყენების შესაძლებლობაც ჰქონდა მხოლოდ კრისტალ ჯგუფის მომხმარებლებს. უნებართვოდ აშენებული სასტუმრო-აპარტამენტების რეალიზაციის შედეგად, უკანონოდ მიღებულმა შემოსავალმა, რამდენიმე ათეული მილიონი ლარი შეადგინა.

ამ ეტაპისათვის, გამოძიებით დადგენილია 1 894 925 ლარის ოდენობით უკანონო შემოსავლის ლეგალიზაციის ფაქტი.

საქმეზე გამოძიება ინტენსიურად გრძელდება, "კრისტალ ჯგუფის" დანაშაულებრივი საქმიანობის შესწავლის და მათთან შესაძლო კავშირში მყოფი პირების, მათ შორის დანაშაულის ხელშემწყობი საჯარო მოხელეების დადგენის და მხილების მიზნით", — წერია გავრცელებულ განცხადებაში.

გამოძიება საქართველოს სისხლის სამართლის კოდექსის 192-ე მუხლის პირველი ნაწილით, 218-ე მუხლის მე-2 ნაწილით და 194-ე მუხლის მე-3 ნაწილით მიმდინარეობს, რაც სასჯელის სახით 9-დან 12 წლამდე ვადით თავისუფლების აღკვეთას ითვალისწინებს.

როგორც bm.ge წერს, სტეფანიანს 2021 წელს ქართული ოცნებისთვის 50 000 ლარი აქვს შეწირული, 2018 წელს — სალომე ზურაბიშვილი დამოუკიდებელი კანდიდატისთვის — 60 000 ლარი. 2012 წელს ნაცმოძრაობისთვის — 2500 ლარი.