საქართველოს ეკონომიკის სამინისტრომ ორგანიზაცია კავკასიურ სახლს დროებით სარგებლობაში, 15 წლის ვადით გადასცა თბილისში, ტაბიძის 20-ში მდებარე შენობის ნაწილი, სადაც ორგანიზაცია უკვე ათწლეულებია მუშაობს.

კავკასიური სახლის ინფორმაციით, შესაბამის ხელშეკრულებას ხელი 2016 წლის 17 თებერვალს მოეწერა.

ორგანიზაციის განცხადებაში წერია, რომ ამ ხელშეკრულების გაფორმების შედეგად "15-წლიანი ბრძოლა დამთავრდა". კავკასიური სახლი მადლობას უხდის ყველა გულშემატკივარს, რომელიც მას გვერდით ედგა გაურკვევლობის პერიოდში, კერძოდ, მათი ინფორმაციით, ხელისუფლება 2010 წლიდან ცდილობდა აღნიშნული ფართი სხვა ორგანიზაციისთვის გადაეცა, თუმცა, საზოგადოების წინააღმდეგობის შედეგად, ასე არ მოხდა.

"რომ არა თქვენი ერთგულება, არავინ უწყის, რა ბედი ელოდა ორგანიზაციას, რომელიც 1973 წლიდან არსებობდა როგორც მთარგმნელობითი ცენტრი, ხოლო უკანასკნელი 25 წლის განმავლობაში ემსახურება ბავშვებისა და ახალგაზრდების უფასო განათლებას, შიდაკავკასიურ სამშვიდობო დიალოგს, კულტურული და ბუნებრივი მემკვიდრეობის გადარჩენას, პროფესიული თარგმანის საქმეს და სხვა", - აცხადებს კავკასიური სახლი.