მოსამართლე თამარ მჭედლიშვილმა დააკმაყოფილა პროკურატურის შუამდგომლობა ნინო დათაშვილისთვის აღკვეთის ღონისძიების სახით შეფარდებული პატიმრობა 5 000 ლარიანი გირაოთი შესცვლოდა.

ამავე შუამდგომლობით აპირებდა მიმართავს სასამართლოსთვის დაცვის მხარე.

"ნინო დღეს არის ტანჯვაში და მე პროკურატურის მიმართ მადლიერებას ვერ გამოვხატავ. პირველივე სხდომაზე იცოდით, რომ ჯანმრთელობის მძიმე მდგომარეობა ჰქონდა. ის, რომ მას დღეს ორი ოპერაცია აქვს გასაკეთებელი, თქვენი პასუხისმგებლობაა.

2 თვის განმავლობაში ამას ვიძახდით. ტანჯვაა, როცა ვერ გადაადგილდება ადამიანი, თვითმოვლას ვეღარ ახერხებს, კიდურებს ვეღარ ამოძრავებს, რადგან ასე გადაწყვიტა პროკურატურამ. სანამ უკანასკნელ მდგომარეობამდე არ მივიდა, მანამდე ვერ გადაწყვიტეს, რომ ამაზე ერთი წინადადება ეთქვათ. დაკავების პირველივე დღიდან ნინო დათაშვილი უკანონო პატიმრობაში იმყოფება", — განაცხადა ნინო დათაშვილის ადვოკატმა, თამარ გაბოძემ. (კომენტარს "ნეტგაზეთი" ავრცელებს).

პროკურატურამ დათაშვილისთვის პატიმრობის გირაოთი შეცვლის შუამდგომლობით დღეს მიმართა.

"საქართველოს პროკურატურა ბრალდებულ ნინო დათაშვილის ჯანმრთელობის მდგომარეობის გათვალისწინებით სასამართლოს შუამდგომლობით მიმართავს, რომ ბრალდებულს აღკვეთის ღონისძიების სახით შეფარდებული პატიმრობა გირაოთი შეეცვალოს.

როგორც ბრალდების მხარისთვის გახდა ცნობილი, ბრალდებულისთვის ჩატარებული სამედიცინო კვლევების შედეგად დადასტურებულია, რომ მას ესაჭიროება ქირურგიული ჩარევა და შემდგომი მკურნალობა.

პროკურატურა სასამართლოს ბრალდებულისთვის აღკვეთის ღონისძიების შეცვლის თაობაზე შუამდგომლობით დღესვე მიმართავს", — წერია პროკურატურის მიერ გავრცელებულ განცხადებაში

სამოქალაქო განათლების მასწავლებელ ნინო დათაშვილს მიმდინარე წლის 9 ივნისს სასამართლოს მანდატურზე თავდასხმას ედავებოდნენ. მას ბრალი სსკ-ს 353/2 მუხლის მე-3 ნაწილით ჰქონდა წარდგენილი, რაც სამსახურებრივი მოვალეობის შესრულების დროს საჯარო მოსამსახურეზე ძალადობას გულისხმობს და 4-დან 7 წლამდე პატიმრობას ითვალისწინებს.