"ოცნების" ხელისუფლების მთავრობის დადგენილებით, განათლების საერთაშორისო ცენტრის ლიკვიდაცია მოხდა. შესაბამის დადგენილებას ხელს "ოცნების" პრემიერმინისტრი ირაკლი კობახიძე აწერს. დადგენილება 21 ოქტომბრით თარიღდება და ის 2026 წლის 1 იანვრიდან ამოქმედდება.

"საჯარო სამართლის იურიდიული პირის შესახებ" საქართველოს კანონის მე-17 მუხლის შესაბამისად, ლიკვიდირებულ იქნეს საქართველოს განათლების, მეცნიერებისა და ახალგაზრდობის სამინისტროს (შემდგომში − სამინისტრო) მმართველობის სფეროში მოქმედი საჯარო სამართლის იურიდიული პირი – განათლების საერთაშორისო ცენტრი", — წერია დადგენილებაში.

ლიკვიდირებული ცენტრის უფლებამონაცვლედ საქართველოს განათლების, მეცნიერებისა და ახალგაზრდობის სამინისტრო განისაზღვრა და ცენტრის ლიკვიდაციის შედეგად დარჩენილი ყველა დოკუმენტაცია სამინისტროს უნდა გადაეცეს.

"დაევალოს სამინისტროს:

ა) ცენტრის სალიკვიდაციო ღონისძიებების ორგანიზაციული უზრუნველყოფის მიზნით, შექმნას სალიკვიდაციო კომისია, რომელიც 2025 წლის 31 დეკემბრის ჩათვლით უზრუნველყოფს:

ა.ა) ცენტრის ბალანსზე რიცხული ქონებისა და დებიტორულ-კრედიტორულ დავალიანებათა სრულ ინვენტარიზაციასა და სალიკვიდაციო ბალანსის შედგენას;

ა.ბ) ცენტრში არსებული დოკუმენტაციის (მასალის) დამუშავებას, სისტემატიზაციასა და დაარქივებას (საჭიროების შემთხვევაში − განადგურებას), კანონმდებლობით დადგენილი წესით;

ა.გ) ცენტრის ლიკვიდაციასთან დაკავშირებული, კანონმდებლობით დადგენილი სხვა ღონისძიებების განხორციელებას;

ბ) უზრუნველყოს, ამ დადგენილებით დაკისრებული ფუნქციების შესასრულებლად, მისთვის სახელმწიფო ბიუჯეტით გამოყოფილი ასიგნებების გამოყენება;

გ) განახორციელოს შესაბამისი ღონისძიებები, სათანადო სამართლებრივი აქტების პროექტების შემუშავებისა და გამოცემის/მიღების მიზნით," — ნათქვამია ოცნების ხელისუფლების მთავრობის დადგენილებაში.

განათლების საერთაშორისო ცენტრი 2014 წელს დაარსდა და მისი მიზანი სახელმწიფოს განვითარების პრიორიტეტების გათვალისწინებით, საერთაშორისო სტანდარტების შესაბამისი ცოდნისა და უნარების მქონე კადრების განვითარება და საქართველოში ახალი ცოდნის ინტეგრირება იყო.

ცენტრი საქართველოს მოქალაქეებსა სთავაზობდა შესაძლებლობას, ესწავლათ მსოფლიოს წამყვან უნივერსიტეტებში და სასწავლო პროგრამის დასრულების შემდგომ, შეძენილი ცოდნის რეალიზება საკუთარ ქვეყანაში, საქართველოში მოეხდინათ.