გზის გადაკეტვის ბრალდებით დაკავებულ აზერბაიჯანელ ჟურნალისტს აფგან სადიგოვს 14-დღიანი პატიმრობა შეეფარდა. დღეს ჩანიშნულ პროცესზე სადიგოვმა განაცხადა, რომ სასჯელის მოხდის შემდეგ, ისევ რუსთაველზე გავა.

"მე ქართველი ხალხის გულშემატკივარი ვარ ბოლომდე, რომელთა უფლებებიც ირღვევა და უარს ვეტყვი დიქტატორ ივანიშვილის, ვინც დიქტატურას უჭერს მხარს... აქედან რომ წავალ, კიდევ რუსთაველზე გავალ. ნუ იქნებით პოლიტიკური დაკვეთების და დიქტატურის მხარდამჭერი. კითხვა მაქვს — რატომ არ იძიებთ თქვენ და რასაც გაბარებენ ზემდგომები ამას ასრულებთ?. მე სხვა კითხვა არ მაქვს, მხოლოდ პროტესტი მაქვს, ივანიშვილის და დიქტატურის მიმართ," — განაცხადა სადიგოვმა სასამართლე პროცესზე.

სოციალური სამართლიანობის ცენტრის მიერ გავრცელებულ ინფორმაციაში ნათქვამია, რომ "თბილისის საქალაქო სასამართლოში გამართული სასამართლო პროცესის დროს შსს-ს თანამშრომლებმა მტკიცებულების სახით წარმოადგინეს ვიდეომასალა, სადაც ადგილზე მყოფ პირებს მოუწოდებდნენ გზის გათავისუფლებისკენ ქართულ ენაზე. მიუხედავად ადვოკატის განმარტებისა, რომ აფგან სადიგოვს არ ესმის ქართული ენა, მოსამართლემ აღნიშნული გარემობა არც კი შეაფასა და ყოველგვარი დასაბუთების გარეშე გამოიყენა ყველაზე მკაცრი ადმინისტრაციული სახდელი"

"დღეს, თბილისის საქალაქო სასამართლოს ადმინისტრაციულ საქმეთა კოლეგიის მოსამართლე ზვიად ცეკვავამ ადმინისტრაციული წესით დაკავებული აზერბაიჯანელი ჟურნალისტი აფგან სადიგოვი სამართალდამრღვევად სცნო და ადმინისტრაციული სახდელის სახედ და ზომად 14 დღით ადმინისტრაციული პატიმრობა განუსაზღვრა.

აფგან სადიგოვი, საქართველოს შინაგან საქმეთა სამინისტროს თანამშრომლებმა 2025 წლის 22 ოქტომბერს, ღამით, თბილისში, საცხოვრებელი სახლიდან გამოსვლისას ადმინისტრაციული წესით დააკავეს. შსს აფგან სადიგოვს საქართველოს ადმინისტრაციულ სამართალდარღვევათა კოდექსის 174-ე პრიმა მუხლის მე-10 ნაწილით გათვალისწინებული ქმედების ჩადენას ედავება, რაც საპროტესტო აქციაზე გზის სავალი ნაწილის სრულ ან ნაწილობრივ გადაკეტვას გულისხმობს და სახდელის სახით ადმინისტრაციულ პატიმრობას 15 დღემდე ვადით ითვალისწინებს.
აფგან სადიგოვი განმარტავს, რომ დაკავების შემდეგ პოლიციის თანამშრომლებს რამდენიმე საათი ჰყავდათ ავტომობილში მოთავსებული და ხელებზე ძლიერად ჰქონდა მოჭერილი ხელბორკილი. პოლიციის თანამშრომლებმა მას არ მისცეს ადვოკატთან დარეკვის და გასაუბრების შესაძლებლობა.

ადმინისტრაციულ სამართალდარღვევათა კოდექსში განხორციელებული რეპრესიული ცვლილებები და სასამართლო პრაქტიკა უხეშად არღვევს ადამიანის ფუნდამენტურ უფლებებს და ფაქტობრივად ახდენს შეკრებისა და გამოხატვის თავისუფლების კრიმინალიზებას საქართველოში. გაუმართლებლად მაღალი სახდელები, ადმინისტრაციულ სამართალდარღვევათა კოდექსის დაბალი პროცედურული სტანდარტების ფონზე, ქმნის ადამიანის თავისუფლებებში უხეში და აგრესიული ჩარევის მაღალ რისკებს და მოქალაქეს სრულიად დაუცველს ტოვებს რეპრესიული სახელმწიფო აპარატის წინაშე.
მოცემულ შემთხვევაშიც, აფგან სადიგოვის მიმართ მიღებული სასამართლო გადაწყვეტილება კიდევ ერთხელ აჩვენებს, რომ მისი მიზანი პროტესტში აქტიურად ჩართული აქტივისტის სამაგალითო დასჯა უფროა", — ნათქვამია გავრცელებულ ინფორმაციაში.

აფგან სადიგოვი 22 ოქტომბერს დააკავეს. სოციალური სამართლიანობის ცენტრის ხელმძღვანელმა, თამთა მიქელაძემ გუშინ სოციალურ ქსელში დაწერა, რომ ის საღამოს რუსთაველზე, აქციაზე წავიდა, მაგრამ, დიდი ალბათობით, იქამდე არ მისულა, მის სახლთან დამონტაჟებული კამერა კი, მაღალი ალბათობით, გამორთული იყო.

"ადმინისტრაციული წესით არის დაკავებული საბოლოოდ. ახლა დაგვიდასტურა პატრულმა!
აფგან სადიგოვთან კონტაქტი გაწყდა დღეს საღამოს და ამ დრომდე ვერ ვუკავშირდებით.
კამერა, რომელიც მის სახლთან დავამონტაჟეთ, მაღალი ალბათობით გამორთული აღმოჩნდა იმ რამდენიმე წუთის განმავლობაში, რომელიც ემთხვევა მისი ბოლო კომუნიკაციის დროს მეუღლესთან, სადაც მან უთხრა, რომ რუსთაველზე მიდიოდა.

რუსთაველზე აფგან სადიგოვი, მაღალი ალბათობით, ვერ წავიდა, რადგან მისი თანმხლები პირი, ვისთან ერთადაც მეტროთი რუსთაველზე მიდიოდა ხოლმე, ამბობს, რომ დანიშნულ დროს აფგანი მასთან არ მივიდა. გამორთული კამერა მისი გასვლის ეპიზოდს არ აჩვენებს", — დაწერა თამთა მიქელაძემ.

ცნობისთვის, აზერბაიჯანელი ჟურნალისტი, აფგან სადიგოვი საქართველოში 2024 წლის 3 აგვისტოს დააკავეს. მას აზერბაიჯანში მიმდინარე გამოძიების საფუძველზე გამოძალვის ორ ეპიზოდს ედავებოდნენ. სადიგოვი 12 სექტემბრიდან 161 დღე შიმშილობდა. 2025 წლის 14 იანვარს ადამიანის უფლებათა ევროპულმა სასამართლომ შუალედური გადაწყვეტილება მიიღო, რომლის მიხედვითაც აზერბაიჯანელი ჟურნალისტის აფგან სადიგოვის აზერბაიჯანში ექსტრადირება იკრძალება, რის შემდეგ სადიგოვმა შიმშილბა შეწყვიტა.