სასამართლომ ჟურნალისტ ირაკლი წულაიას, გზის გადაკეტვის ბრალდებით, 8-დღიანი პატიმრობა მიუსაჯა — გადაწყვეტილება მოსამართლე თორნიკე ქოჩქიანმა მიიღო.

წულაიამ სასამართლო პროცესზე განაცხადა, რომ ის ნოემბრის პროევროპულ აქციებზე დააკავეს, ფიზიკურად გაუსწორდნენ და დაზარალებულად არის ცნობილი, ხოლო მისი საქმე დღემდე არ არის გამოძიებული. წულაიამ შემდეგ დასძინა, რომ ნათლად უნდა ყველა მოქალაქეს აჩვენოს, რომ "არ დაემორჩილონ აღნიშნულ კანონებს".

"ნოემბერში დამაკავა სპეცრაზმმა, გამისწორდნენ სასტიკად, ვარ დაზარალებულად ცნობილი. ერთი წლის განმავლობაში არ დაკითხულა არც ერთი სპეცრაზმელი, არც ერთი პოლიციელი, ერთი წლის განმავლობაში არც ერთი მოძრაობა არ გაუკეთებია ასე ვთქვათ სამართალდამცავ ორგანოებს. არ ვაღიარებ ამ არალეგიტიმური პარლამენტის მიერ მიღებულ კანონებს, ჩემი პროტესტი, პოლიტიკური აქტი თუ რაც გინდათ ის დავარქვათ, იყო, რომ არ დავემორჩილო ამ კანონებს, რომლებსაც არალეგიტიმური პარლამენტი იღებს.

ნათელი გახდება ყველა მოქალაქისთვის — საწინააღმდეგო პოლიტიკური შეხედულების ადამიანებისთვის კანონი მკაცრია და როცა პოლიციელებს ეხება, კანონი საერთოდ არ არსებობს და მათ საერთოდ არ ეხებათ, აქედან გამომდინარე, ეს იყო ჩემი პოლიტიკური აქტი — ყველას მინდა დავანახო, რომ არ დაემორჩილონ აღნიშნულ კანონებს.

არც ერთი საერთაშორისო ორგანიზაციის, არც ერთი თავისუფალი, დემოკრატიული ქვეყნის მიერ არ არის აღიარებული ეს პარლამენტი, ის არის გაყალბებული არჩევნებით მოსული და ის არ წარმოადგენს ლეგიტიმურ საკანონმდებლო ორგანოს. აქედან გამომდინარე, მის მიერ მიღებული ყველა კანონი არის უკანონო და არ დავემორჩილები არც ერთ შემთხვევაში," — განაცხადა სასამართლო სხდომაზე წულაიამ.

შეგახსენებთ, ქართული ოცნების პარლამენტმა შეკრება-მანიფესტაციებთან დაკავშირებული წესების გამკაცრების კანონი დაჩქარებული წესით, 2 დღეში მიიღო. საკანონმდებლო ცვლილებების მიხედვით, გზის გადაკეტვა, რომელიც ტრანსპორტის მოძრაობას ხელს შეუშლის ისჯება 15-დღიანი პატიმრობით.