EPDE-ს (ევროპულმა პლატფორმა დემოკრატიული არჩევნებისთვის) განცხადებას, 4 ოქტომბრის თვითმმართველობის არჩევნებზე "ფეიქ დამკვირვებლების" შესახებ, ცესკო გამოეხმაურა და დეზინფორმაციული უწოდა.

ცენტრალური საარჩევნო კომისიის მიერ გავრცელებულ განცხადებაში ნათქვამია, რომ იმ ადამიანების "ფეიქ დამკვირვებლებად" მოხსენიება, რომლებიც არჩევნებს აკვირდებოდნენ პროცესის მიზანმიმართულ დაზიანებას ისახავს მიზნად.

"საარჩევნო ადმინისტრაცია მიიჩნევს, რომ EPDE-ის მორიგი დეზინფორმაციული განცხადება კიდევ უფრო მეტ კითხვის ნიშანს აჩენს ორგანიზაციის ობიექტურობასთან დაკავშირებით.
ორგანიზაციის მოწოდებები ცესკოს მიმართ, რბილად რომ ვთქვათ მის კომპეტენციას აყენებს კითხვის ნიშნის ქვეშ. ვინაიდან წარმოუდგენელია ორგანიზაციამ, რომელიც როგორც მინიმუმ გასული წლის საპარლამენტო არჩევნებს აკვირდებოდა საქართველოში, არ იცოდეს, რომ არჩევნებზე დამკვირვებელთა რეგისტრაციის კრიტერიუმები და მათი უფლებები საჯაროა და განთავსებულია ცესკოს ოფიციალურ ვებგვერდზე", — წერია ცესკოს განცხადებაში.

ცენტრალური საარჩევნო კომისია ასევე წერს, რომ იმ ადამიანების "ფეიქ დამკვირვებლებად" მოხსენიება, რომლებიც არჩევნებს აკვირდებოდნენ პროცესის მიზანმიმართულ დაზიანებას ისახავს მიზნად. მათივე განმარტებით, თვითმმართველობის არჩევნები მაღალპროფესიულ დონეზე ჩატარდა და მისი შედეგები მონაწილე პოლიტიკურმა პარტიებმა აღიარეს.

"კატეგორიულად ვაცხადებთ, რომ საარჩევნო ადმინისტრაცია სადამკვირვებლო ორგანიზაციების რეგისტრაციას ახორციელებს კანონის დაცვით და 4 ოქტომბრის არჩევნებზე ყველა მსურველს, ვინც კანონით დადგენილ კრიტერიუმებს აკმაყოფილებდა ჰქონდა საშუალება დაჰკვირვებოდა საარჩევნო პროცესს. შესაბამისად მივიჩნევთ, რომ ამ საკითხით მანიპულირება და სადამკვირვებლო ორგანიზაციების სხვადასხვა ნიშნით დაყოფა, მათ შორის მათი "ფეიქ დამკვირვებლებად" მოხსენიება, პროცესის მიზანმიმართულ დაზიანებას ისახავს მიზნად.
შევახსენებთ EPDE-ს, რომ 4 ოქტომბრის არჩევნები ჩატარდა მაღალპროფესიულ დონეზე და მას აკვირდებოდა როგორც ადგილობრივი, ისე საერთაშორისო სადამკვირვებლო ორგანიზაციები. რაც ყველაზე მნიშვნელოვანია არჩევნების შედეგები აღიარეს მასში მონაწილე პოლიტიკურმა პარტიებმა", — წერია განცხადებაში.

ცესკოს განცხადებით, EPDE-ს განცხადებები ვერ ჩაითვლება სანდოდ. ცესკო EPDE-ს მოუწოდებს "იმოქმედოს საკუთარი სახელწოდებისა და დეკლარირებული ღირებულებების შესაბამისად: უზრუნველყოს ობიექტურობა, მიუკერძოებლობა და პატივი სცეს სახელმწიფოთა სუვერენულ ინსტიტუციებს."

"საქართველოს ცენტრალური საარჩევნო კომისია კიდევ ერთხელ მოუწოდებს EPDE-ს — იმოქმედოს საკუთარი სახელწოდებისა და დეკლარირებული ღირებულებების შესაბამისად: უზრუნველყოს ობიექტურობა, მიუკერძოებლობა და პატივი სცეს სახელმწიფოთა სუვერენულ ინსტიტუციებს.

აღვნიშნავთ, რომ EPDE-ს განცხადებები ვერ ჩაითვლება სანდოდ და აღიქმება როგორც საარჩევნო პროცესის მიზანმიმართული დაზიანების მცდელობა, რათა გადაიფაროს წარმატებით ჩატარებული არჩევნები და შეარყიოს საზოგადოების ნდობა საქართველოს საარჩევნო ადმინისტრაციისა და არჩევნების ლეგიტიმურობის მიმართ", — დაწერა ცესკომ.

EPDE-მ 16 ოქტომბერს განცხადება გაავრცელა, სადაც ნათქვამია, რომ მათ საქართველოს თვითმმართველობის არჩევნებზე 29 ყალბი დამკვირვებელი გამოავლინეს.

მათი განმარტებით, "ნამდვილ დამკვირვებელთა არყოფნის პირობებში, ხარვეზი პოლიტიკური თვალსაზრისით მიკერძოებულმა "ყალბმა დამკვირვებლებმა" შეავსეს."

"ჩვენმა მონიტორინგმა 29 ყალბი დამკვირვებელი გამოავლინა, რომლებმაც საქართველოს ხელისუფლებას 2025 წლის 4 ოქტომბრის ადგილობრივი არჩევნების ლეგიტიმურობის ილუზიის შექმნაში ხელი შეუწყო.

ეს უკვე მეორე შემთხვევაა, როდესაც მმართველმა პარტიამ — ქართული ოცნებამ — არჩევნებზე ყალბი დამკვირვებლები მოიწვია, რაც 2024 წლის სადავო საპარლამენტო არჩევნების შემდეგ განმეორდა. აღნიშნული ტენდენცია აჩვენებს, რომ საქართველო ახლა იმ ქვეყნების მაგალითს მიჰყვება, როგორიცაა რუსეთი, აზერბაიჯანი და ბელარუსი, სადაც მსგავსი პრაქტიკა უკვე წლებია დამკვიდრებულია.

საქართველოს მოქალაქე დამკვირვებლებმა, მათ შორის სამართლიანი არჩევნების და დემოკრატიის საერთაშორისო საზოგადოების (ISFED) წევრმა ორგანიზაციამ, ადგილობრივი არჩევნების მონიტორინგზე უარი განაცხადეს. მათი შეფასებით, ძირითადი უფლებების დაცვა, საარჩევნო კანონმდებლობის სტაბილურობა და პროცედურული გარანტიები არსებითად არ იყო უზრუნველყოფილი, რაც თავისუფალი, სამართლიანი და კონკურენტული არჩევნების ჩატარებას გამორიცხავდა.

საერთაშორისო დამკვირვებლები ეუთოს დემოკრატიული ინსტიტუტებისა და ადამიანის უფლებების ოფისიდან (ODIHR) არჩევნებზე მხოლოდ არჩევნებამდე ერთ თვეზე ნაკლები დროით მიიწვიეს, რაც არ იძლეოდა შინაარსიანი და სანდო საერთაშორისო მონიტორინგის შესაძლებლობას ODIHR-ის მეთოდოლოგიის შესაბამისად.

ნამდვილ დამკვირვებელთა არყოფნის პირობებში, ხარვეზი პოლიტიკური თვალსაზრისით მიკერძოებულმა "ყალბმა დამკვირვებლებმა" შეავსეს", — წერია განცხადებაში.