როგორც 18 ოქტომბერს, სუს-ის ანტიკორუფციული სააგენტოს დირექტორმა, ემზარ გაგნიძემ განაცხადა, ირაკლი ღარიბაშვილის, გრიგოლ ლილუაშვილის, ოთარ ფარცხალაძის, რომეო მიქაუტაძის და მათთან დაკავშირებული პირების სახლებიდან ჩხრეკის შედეგად ამოღებულია 7 002 200 აშშ დოლარი და 136 000 ლარი.

ქართული ოცნების ყოფილი მაღალჩინოსნებისგან განსხვავებით, უმეტესობას 7 მილიონი დოლარი რეალურ ცხოვრებაში არასდროს გვაქვს ნანახი. შესაბამისად, ჩვენთვის რთული წარმოსადგენია, რა ადგილის დაკავება შეუძლია ამ მოცულობის თანხას.

ამ სტატიაში ამის წარმოდგენაში დაგეხმარებით. მაგრამ მანამდე, შეგახსენებთ, რომ ეს თანხა ეროვნულ ვალუტაში, ამჟამინდელი კურსით, 18 900 000 ლარია.

როგორ დავთვალოთ, რა სივრცეს იკავებს 7 მილიონი დოლარი?

პირველ რიგში, უნდა ვივარაუდოთ, რა კუპიურებით იქნება წარმოდგენილი ეს თანხა. ამ სტატიაში, სუს-ის მიერ გამოქვეყნებულ კადრებზე დაყრდნობით ვუშვებთ, რომ ეს 7 მილიონი მთლიანად 100-დოლარიანი კუპიურებისგან შედგება. ამ დაშვების პარალელურად შეგვიძლია დავთვალოთ რაოდენობაც — 7 000 000 უნდა გავყოთ 100-ზე, რის შედეგადაც მივიღებთ 70 000-ს.

მეორე ნაბიჯი კუპიურის ზომის გათვალისწინებაა. ერთი 100-დოლარიანი სიგრძეში 15.6 სანტიმეტრის ზომისაა, ხოლო სიგანეში 6.6 სმ-ია. რაც შეეხება სისქეს, რომლის გათვალისწინებაც ასეთ მასშტაბზე, ცხადია, მოგვიწევს, 0.011 სმ-ია.

ახლა შეგვიძლია 7-მილიონიანი დასტის სიმაღლე დავთვალოთ. ამისთვის 70 000 ცალი 100-დოლარიანი უნდა გავამრავლოთ თითოეულის სისქეზე, ანუ 0.011-სმ-ზე. შედეგად მივიღეთ 770 სანტიმეტრი, ანუ 7.7 მეტრი.

ანუ 7 მილიონი დოლარი, 100-დოლარიანი კუპიურებით, ერთმანეთზე რომ დაგვეწყო, 7.7 მეტრიანი სვეტი გამოვიდოდა...

მასშტაბის წარმოსადგენად მნიშვნელოვანია წონის გათვალისწინებაც. ერთი ცალი 100-დოლარიანი 1 გრამს იწონის, რაც ნიშნავს, რომ ასეთი 70 000 კუპიურა 70 კილოს იწონის. ეს მოზრდილი ადამიანის საშუალო წონაა.

7 მილიონი დოლარი (100-დოლარიან კუპიურებში წარმოდგენილი) 70 კილოს იწონის, ანუ საშუალოსტატისტიკური ადამიანის წონისაა.

თუ გავითვალისწინებთ იმას, რომ სავარაუდოდ (არ გვინახავს, მაგრამ ვვარაუდობთ), რომ მილიონებს სვეტებად, ალბათ, არავინ ინახავს, უნდა წარმოვიდგინოთ ამ თანხის ფიზიკური მოცულობა იმ შემთხვევაშიც, თუ 100-დოლარიანები შეკვრებში იქნება მოთავსებული, ასევე გვერდიგვერდ და ერთმანეთზე დალაგებული (როგორც ნებისმიერი ჩვენგანი დაალაგებდა ფულს, რომ ჰქონდეს...) თითო შეკვრაში 100 კუპიურა რომ მოგვეთავსებინა 10 000-დოლარიან შეკვრებს მივიღებდით. ხოლო 7 მილიონი ასეთი 700 შეკვრის ერთობლიობა იქნებოდა.

ზემოთ აღნიშნულ ზომებს (თითო 100-დოლარიანის ზომასა და წონას) თუ გავითვალისწინებთ, ერთი ასეთი შეკვრა 15.6 სმ სიგრძის, 6.6 სმ სიგანისა და 1.1 სმ სისქის იქნებოდა (დატკეპნილ და გატკიცინებულ მდგომარეობაში, ცხადია). ასეთი შეკვრების მანქანის საბარგულში მოთავსება რომ მოგვენდომებინა, 80 სანტიმეტრის სიგრძის, 50 სანტიმეტრის სიგანის და 25 სანტიმეტრის სიმაღლის ოთხკუთხედს მივიღებდით.

ანუ 7 მილიონი დოლარი მანქანის საბარგულში, კარადაში და სამზარეულოს მაგიდაზეც დაგეტეოდათ (დათვლისას), რომ გქონდეთ.