შინაგან საქმეთა სამინისტროს განსაკუთრებულ დავალებათა დეპარტამენტის ოპერატიული დაგეგმვის სამმართველოს ყოფილი უფროსი ირაკლი შაიშმელაშვილი 4 ოქტომბრის აქციაზე განვითარებულ მოვლენებს ეხმაურება და წერს, რომ ის "ისეთივე მხარდამჭერი იყო პროცესების, როგორც იქ მდგომი ნებისმიერი მოქალაქე და არა ორგანიზატორი". შაიშმელაშვილი იმასაც აღნიშნავს, რომ "ამ ეტაპზე პრობლემებს და შეცდომებს საკუთარ თავში ვეძებ და სხვას ტალახს არ ესვრის".

"წინასიტყვაობის გარეშე,

1) მე ისეთივე მხარდამჭერი ვიყავი პროცესების, როგორც იქ მდგომი ნებისმიერი მოქალაქე და არა ორგანიზატორი;

2) რჩევა თუ რეკომენდაცია, რომელიც ვინმესთვის მიმიცია, იგივე არაერთხელ მაქვს საჯაროდ ნათქვამი. იატაკქვეშეთში არაფერს არ ვაკეთებდი;

3) სად იყვნენ შსს-ს თანამშრომლები? იქ, სადაც მათი ფუნქცია და ამოცანა მოითხოვდა. მშვიდობიანი აქციის დაშლა შსს-ს არ დაუწყია, მიუხედავად იმისა, რამდენად ვართ გაბრაზებულები მათზე;

4) აქცია დაგეგმილი იყო კონსტრუქციულ რეჟიმში: "საზოგადოების სხვადასხვა ფენების კონსოლიდირება უნდა მომხდარიყო, ერთიანობა და შეთანხმებულიყო, როგორ, რა გზებითა და მეთოდებით განხორციელებულიყო მიტაცებული ქვეყნის დაბრუნება". ამ პირობებში, თუ ვინმე მშვიდობიანი აქციის დაშლის გადაწყვეტილებას მიიღებდა, არა მხოლოდ გდდ-ს, არამედ შსს-ს სხვა თანამშრომლებიც ქართველი ხალხის მხარეს დადგებოდნენ - თუმცა მოხდა ის, რაც მოხდა;

5) ახლა რატომ არ მოდიან შსს-დან თანამშრომლები, ვინც მე მთხოვთ ამაზე პასუხს, არაადეკვატურები ხართ, ამაზე როგორ გაგცეთ პასუხი;

6) არც ორგანიზატორების და არც სხვადასხვა საორგანიზაციო ჯგუფების მოქმედებას ვერ და არ შევაფასებ. ამის არც მორალური და არც სამართლებრივი უფლება არ მაქვს. ვწუხვარ, განვიცდი და ვბრაზობ მხოლოდ იმაზე, რომ დააკავეს ადამიანები და დაკავებების სერიას გააგრძელებს ბორია.

7) მაქვს კითხვები — რა მოხდა, რატომ მოხდა და ა.შ.? ბუნებრივია, მაქვს, და ვცდილობ გავიგო, ამოვხსნა, ოღონდ არავის შეურაცხყოფის ხარჯზე. ამ ეტაპზე პრობლემებს და შეცდომებს საკუთარ თავში ვეძებ და სხვას ტალახს არ ვესვრი;

8 ) ისე, როგორც იქ მდგომმა რიგითმა ადამიანმაც, მეც ჩემი შესაძლებლობების ფარგლებში ვეხმარებოდი პროცესს, რაც შემეძლო ვაკეთებდი და ასე გაგრძელდება მომავალშიც;

9) ჩემთვის ეს ბრძოლა ახლა არ დაწყებულა და მით უფრო ამით არ დასრულებულა. ისევ ისე გავაგრძელებ ბრძოლას ჩვენი ქვეყნის გადასარჩენად.

P.S. არც სტატუსები წამიშლია და არც გვერდი გამიუქმებია, ქოცალა ტროლების შემოტევა იყო და გადავიყვანე მხოლოდ მეგობრებისთვის.

დანარჩენს დრო გვიჩვენებს და მჯერა ყველა კითხვაზე იქნება გაცემული პასუხი და დარწმუნებული ვარ, რომ აუცილებლად გადავრჩებით", — წერს შაიშმელაშვილი.

22 სექტემბერს ირაკლი შაიშმელაშვილმა და ემიგრაციაში მყოფმა ვეტერანებმა საქართველოს ძალოვანი სტრუქტურის თანამშრომლებს საგანგებო განცხადებით მიმართეს და მოუწოდეს, "წამოვიდნენ და წამოიღონ თავიანთი წილი ღირსება" და "ემსახურონ საქართველოს".