შინაგან საქმეთა სამინისტროს ინფორმაციით უწყების 14 თანამშრომელია დაშავებული. მათ შორის ერთ-ერთის ჯანმრთელობის მდგომარეობა მძიმეა.

"საპროტესტო აქციის მონაწილეების მხრიდან განხორციელებული კანონსაწინააღმდეგო ქმედებების, მათ შორის ძალადობრივი ჯგუფების მიერ სამართალდამცველების მისამართით ნასროლი სხვადასხვა საგნის მოხვედრის შედეგად, ამ ეტაპზე არსებული მონაცემებით, შინაგან საქმეთა სამინისტროს 14 თანამშრომელია დაშავებული.

დაშავებულ პოლიციელებს სხვადასხვა სახის ჯანმრთელობის დაზიანება აღენიშნებათ, მათ შორის ერთ-ერთი მათგანი მიღებული დაზიანებების შედეგად
მძიმე მდგომარეობაშია. მათ შესახებ ინფორმაციას საზოგადოებას პერიოდულად მივაწვდით," — განაცხადა ალექსანდრე დარახველიძემ.

უწყების განცხადებით, 4 ოქტომბრის აქციაზე განვითარებულ მოვლენებზე გამოძიება 4 მუხლით დაიწყო — პოლიციელზე თავდასხმა, საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდება, ნივთის დაზიანება ან განადგურება, ჯგუფური ძალადობის ორგანიზება, სტრატეგიული ან განსაკუთრებული მნიშვნელობის ობიექტის ხელში ჩაგდების მცდელობა.

"თბილისში მიმდინარე აქციის ორგანიზატორებისა და მონაწილეების მიერ განხორციელებულ კანონსაწინააღმდეგო და ძალადობრივ ქმედებებთან დაკავშირებით, გამოძიება სისხლის სამართლის კოდექსის 317-ე, 187-ე, 222-ე და 225-ე მუხლებით დაიწყო, რაც პოლიციელზე თავდასხმას, საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდებას, ნივთის დაზიანებას ან განადგურებას,
ჯგუფური ძალადობის ორგანიზებას, ხელმძღვანელობას ან მასში მონაწილეობას,
ასევე, სტრატეგიული ან განსაკუთრებული მნიშვნელობის ობიექტის ხელში
ჩაგდებას ან ბლოკირების მცდელობას გულისხმობს.

გვსურს საზოგადოებას მივაწოდოთ დეტალური ინფორმაცია, აქციის მიმდინარეობისას განვითარებული მოვლენების შესახებ. მთელი დღის განმავლობაში პროტესტის მონაწილეებს შესაძლებლობა ჰქონდათ, მშვიდ ვითარებაში გამოეხატათ პროტესტი და გაეგრძელებინათ აქცია," — განაცხადა უწყებამ.

მოქალაქეებმა პრეზიდენტის სასახლის ეზოს მესერი შეანგრიეს. პოლიციის დანაყოფებმა მოქალაქეებს რეზიდენციის ეზოსა და შენობაში შესვლის საშუალება არ მისცეს. სავარაუდოდ, გაუშვეს წიწაკის სპრეი. ეზოში შესვლა სცადა მოძრაობა რუსთაველის გამზირის წევრმა პაატა ბურჭულაძემაც.

რუსთაველის გამზირზე მყოფი პროტესტის მონაწილეები ორბელიანის მოედნისკენ დაიძრნენ, სადაც საპოლიციო ძალების წარმომადგენლები პერიოდულად იყენებენ წყლის ჭავლსა და გაზის კაფსულებს.

4 ოქტომბრის აქციის ერთ-ერთმა ორგანიზატორმა მურთაზ ზოდელავამ რუსთაველზე შეკრებილებს მიმართა, რომ უკან არ დაიხიონ და არ შეშინდნენ.