28 ოქტომბერს ქუთაისის სააპელაციო სასამართლოში მზია ამაღლობელის სასამართლო პროცესი ჩაინიშნა. ადვოკატების განცხადებით, ბათუმის საქალაქო სასამართლოს მიღებული გადაწყვეტილება უკანონო და დაუსაბუთებელია და დაცვის მხარის არცერთ კითხვას არ პასუხობს.

"გასაჩივრებული განაჩენი არის უკანონო და დაუსაბუთებელი, უკიდურესად შაბლონური, რომელიც სრულებით არ ასახავს არც სასამართლო სხდომებზე მტკიცებულებათა გამოკვლევის შედეგებს, ასევე არ პასუხობს დაცვის მხარის არათუ რომელიმე არგუმენტს, არამედ არ პასუხობს დაცვის მხარის არც ერთ არგუმენტს და არ აფასებს დაცვის მხარის არც ერთ მტკიცებულებას.

განაჩენი იმდენად დაუსაბუთებელია, როგორც ფაქტობრივი, ისე სამართლებრივი თვალსაზრისით, რომ იქმნება აღქმა, ის დაწერილია იმ პირის მიერ, ვინც არ ესწრებოდა სასამართლო სხდომებს 5 თვის განმავლობაში, ან ესწრებოდა, მაგრამ არ მოუსმენია. შესაბამისად, არ გაუანალიზებია და არც შეუფასებია რამე, რასაც დაცვის მხარე უთითებდა, ასაბუთებდა, ედავებოდა ბრალდებას, მათი დასკვნითი სიტყვის ჩათვლით.
გასაჩივრებულ განაჩენში სრულიად იგნორირებულია დაცვის მხარე, დაცვის უფლება და მისი მონაწილეობა დაცვის მტკიცებულებათა წარმოდგენის, გამოკვლევის, ბრალდების მტკიცებულებათა შედავების, მხარეთა შეჯიბრებითობისა და მხარეთა თანასწორობის უზრუნველყოფის თვალსაზრისით.

გასაჩივრებული განაჩენი დასტურია იმის, რომ მზია ამაღლობელს არ უსარგებლია სამართლიანი სასამართლოს კონსტიტუციური უფლებით," – ნათქვამია სააპელაციო საჩივარში, რომელსაც მზია ამაღლობელის ადვოკატები ხელს აწერენ.

შეგახსენებთ, 6 აგვისტოს მოსამართლე ნინო სახელაშვილმა "ბათუმელებისა" და "ნეტგაზეთის" დამფუძნებელ მზია ამაღლობელს 2 წლით თავისუფლების აღკვეთა მიუსაჯა. ამაღლობელზე სამართლებრივი დევნა იმ დროისთვის ბათუმის პოლიციის უფროსის, ირაკლი დგებუაძის სარჩელის საფუძველზე დაიწყო. დგებუაძემ სასამართლო პროცესზეც განაცხადა, რომ ქალი ჟურნალისტის გარტყმული სილისგან მან "ტკივილი იგრძნო".

განაჩენის გამოტანამდე მზია ამაღლობელი 8 თვე წინასწარ პატიმრობაში იმყოფებოდა. როდესაც მოსამართლე სახელაშვილმა ამაღლობელს ბრალი 353-ე მუხლი შედარებით "მსუბუქი" ბრალდებით გადაუკვალიფიცირა, რაც ჯარიმით გათავისუფლებას ითვალისწინებდა — სახელაშვილმა წინასწარი პატიმრობის მიუხედავად ამაღლობელს თავისუფლების აღკვეთა მიუსაჯა.