ქალი, რომელსაც კასპში ყოფილმა ქმარმა ბენზინი და მჟავა შეასხა და შემდეგ ცივი იარაღით ჭრილობები მიაყენა, კლინიკაში გარდაიცვალა — ამის შესახებ ინფორმაცია თავდაპირველად რეგიონულმა მედია "მოზაიკამ" გაავრცელა.

დამწვრობის ცენტრის ხელმძღვანელის, ლაშა იაშვილის განცხადებით ქალი უმძიმეს მდგომარეობაში იმყოფებოდა — სხეულის 40-45% დამწვრობით და სასუნთქი გზების დაზიანებით. დაზარალებული მართვით სუნთქვაზე იმყოფებოდა.

"პაციენტის მდგომარეობა არის უმძიმესი. სხეულის თითქმის ნახევარი არის დაზიანებული როგორც თერმული აგენტით, ასევე ქიმიური აგენტით. 40-45% არის დამწვრობა, ამას ემატება თერმო-ინჰალაციური, ანუ სასუნთქი გზების დაზიანება. იმყოფება მართვით სუნთქვაზე. პროგნოზებზე ლაპარაკი რთულია. ჩვენი მხრიდან ყველაფერი კეთდება, რომ ეს ახალგაზრდა ადამიანი ამ მძიმე ტრავმიდან გამოვიდეს. ბასრი საგნით ჭრილობა აქვს გულმკერდის არეში, თუმცა გულმკერდის ღრუში შემავალი არაა," — განაცხადა იაშვილმა ქალის კლინიკაში შეყვანის შემდეგ.

პროკურატურის ინფორმაციით, გარდაცვლილი ქალის ქმარი წარსულშიც ნასამართლები იყო, სისტემატურად ძალადობდა მეუღლეზე და ივნისის თვეში, სიტყვიერი შეურაცხყოფის გამო, შემაკავებელი ორდერი ჰქონდა გამოწერილი.

"ბურდული ყოფილ მეუღლეს სისტემატურად სთხოვდა შერიგებას, მისგან საბოლოო უარის მიღების შემდეგ, ბურდულმა ყოფილი მეუღლის მოკვლა განიზრახა. რამდენიმე დღით ადრე შეიძინა ბენზინი, სადარბაზოსთან დახვდა, ჯერ 2-ჯერ ჩაარტყა დანა, შემდგომ გადაასხა აალებადი სითხე და შეეცადა დაწვას, ფაქტს შეესწრო დაზარალებულის დედა.

ივნისის თვეში, სიტყვიერი შეურაცხყოფის გამო, გამოწერილი ჰქონდა შემაკავებელი ორდერი. დაზარალებულის დედის თქმით წარსულშიც არაერთი ფაქტი ყოფილა შეურაცხყოფის.

2023 წელს 260-ე მუხლით გაამტყუნეს, მანამდეც არაერთხელ არის ნასამართლევი. დაუდგინდა ნარკოტიკის მოხმარება და ასევე ალკოჰოლური სიმთვრალე, ბრალდებული დამოკიდებულია აზარტულ თამაშებზე," — განუცხადა პროკურორმა მოზაიკას.

26 სექტემბერს, შსს-მ ყოფილი მეუღლე დააკავა და წინასწარი პატიმრობა შეუფარდა. უწყების ცნობით, გამოძიება სისხლის სამართლის კოდექსის 19-109-ე მუხლით მიმდინარეობს, არც 20 წლამდე თავისუფლების აღკვეთას გულისხმობს.