სასოფლო-სამეურნეო პროდუქციისა და აგროტექნიკის იმპორტიორი კომპანია აგროსფერო უკვე რამდენიმე წელია, აქტიურად თანამშრომლობს აგრარულ უნივერსიტეტთან და სტუდენტებისთვის სხვადასხვა ტიპის საგანმანათლებლო პროგრამებს ახორციელებს. წელს კომპანიის კიდევ ერთი ინიციატივით, აგრარული უნივერსიტეტის ერთ ახალწვეულს სრულად დაუფინანსდება სწავლა. ეს იღბლიანი ახალგაზრდა აგრონომიის, ლანდშაფტის მენეჯმენტისა და მევენახეობა-მეღვინეობის პროგრამის პირველი კურსის სტუდენტი, ელენე უფლისაშვილია, რომელმაც ყველაზე მაღალი შედეგები მიიღო ეროვნულ გამოცდებზე.

ახალი ინიციატივის შესახებ აგროსფეროს მარკეტინგის სამსახურის ხელმძღვანელმა, აკაკი ტოროტაძემ აგრარული უნივერსიტეტის Welcome Party-ზე სიტყვით გამოსვლის დროს განაცხადა.

“ჩვენი კომპანია, აგროსფერო ქართული სოფლის მეურნეობის ერთგული პარტნიორია და მუდმივად ცდილობს წვლილი შეიტანოს ამ სფეროს განვითარებაში. გვჯერა, რომ სწორედ განათლებული ახალგაზრდობაა ის ოქროს ფონდი, რომელიც ჩვენს ქვეყანას ძლიერ მოსავალს მოუტანს. ჩვენი რწმენის დასტურია ის მრავალწლიანი პარტნიორობა, რომელიც გვაკავშირებს ამ უნივერსიტეტთან.

წელს გადავწყვიტეთ, კიდევ უფრო გავაძლიეროთ ერთ-ერთი მთავარი მიმართულება — სტუდენტების განათლების ხელშეწყობა. ამიტომ კომპანია სრულად დააფინანსებს აგრარული უნივერსიტეტის კიდევ ერთ სტუდენტს, ელენე უფლისაშვილს. ეროვნულ გამოცდებზე მიღებული შედეგებით მან აჩვენა, რომ ნამდვილად იმსახურებს თანადგომას.

გვჯერა, ამ გზით ჩვენ ვთესავთ არა მხოლოდ ერთჯერად დახმარებას, არამედ გრძელვადიან ინვესტიციას ჩვენი ქვეყნის მომავალში“, — თქვა მან.

აკაკი ტოროტაძემ ღონისძიებაზე დამსწრე საზოგადოებას, ასევე, წარუდგინა პოსტერი, რომელზეც ასახული იყო წარმატების კიბე სოფლის მეურნეობის პრინციპების მიხედვით. მან აღნიშნა, რომ ეს გზა ფერმერის ერთწლიან სამუშაო ციკლს ჰგავს.

“ყველაფერი იწყება თესლით. ამ შემთხვევაში ეს არის ცოდნა, რომელსაც აქ მიიღებთ. თესლს სჭირდება ნიადაგი — ეს არის შრომა, რომელსაც ყოველდღიური განვითარებისთვის გაიღებთ. შემდეგ ზრდაა ანუ პროგრესი, რომელიც ცხოვრების ხარისხში აისახება. და ბოლოს, მოსავალი — თქვენი წარმატება.

აგროსფეროს უნდა, რომ გზის დასაწყისში, ამ კიბის პირველ საფეხურზე დაგიდგეთ გვერდით, რადგან დარწმუნებული ვართ, რომ ხარისხიანი თესლი, სათანადო მოვლის პირობებში, კარგ ნიადაგზე კარგ შედეგებს გამოიღებს. ასევე ვართ დარწმუნებული, რომ ჩვენი დარგის სპეციალისტის წარმატებისთვის, პირველ რიგში, საჭიროა ხარისხიანი ცოდნის მიღება. სწორედ ამიტომ ვთანამშრომლობთ უნივერსიტეტთან, ამიტომ ვაფინანსებთ ამ წარმატებულ ახალწვეულს და ამიტომ გვიყვარს ამ კიბის პირველ საფეხურზე მათ მხარში დგომა, მოტივაციის მიცემა, მხარდაჭერა და გამხნევება“, — თქვა მან.

აღსანიშნავია, რომ აგროსფერო მე-4 წელია ყოველწლიურად 6 წარჩინებულ სტუდენტს უნიშნავს სტიპენდიას. გარდა ამისა, ათობით ახალგაზრდას სთავაზობს პრაქტიკასა და სტაჟირებას კომპანიის მოწინავე ბაზებზე. აგროსფერო ასევე მხარს უჭერს აგრარული უნივერსიტეტის პრაქტიკულ საგან აგროპროექტს, რომლის ფარგლებშიც სტუდენტები დამოუკიდებლად ზრდიან სხვადასხვა სასოფლო-სამეურნეო კულტურას. კულტურების გაზრდისთვის საჭირო ინოვაციურ პროდუქციას კომპანია უნივერსიტეტს სრულიად უსასყიდლოდ გადასცემს.