გერმანიის კანცლერმა ფრიდრიხ მერცმა ევროკავშირს მოუწოდა, გაყინული რუსული აქტივები გამოიყენოს იმისათვის, რომ უკრაინას 140 მილიარდი ევროს სესხი მისცეს. ამის შესახებ ინფორმაციას უკრაინული მედია მერცის Financial Times-ში გამოქვეყნებულ სტატიაზე დაყრდნობით ავრცელებს.

მერცის თქმით, სესხი სამხედრო აღჭურვილობის შესაძენად უნდა გამოიყენონ, ხოლო შენაძენები კი ევროკავშირის ქვეყნების მთავრობებმა კიევთან შეთანხმებით უნდა გააკეთონ.

სტატიაში მერცი მოითხოვს, რომ ევროკავშირმა აქტივების გამოსაყენებლად სამართლებრივი მექანიზმი იპოვოს და აღნიშნავს, რომ აუცილებელია სისტემატურად და მასშტაბურად გაზარდონ რუსეთის აგრესიის ფასი.

მისი თქმით, ევროკავშირს უკრაინისთვის თითქმის 140 მილიარდი ევროს ოდენობის უპროცენტო სესხის შეთავაზება შეუძლია.

"ეს სესხი მხოლოდ მას შემდეგ დაიფარება, როცა რუსეთი უკრაინას იმ ზარალს აუნაზღაურებს, რაც ამ ომის შედეგად მიაყენა," — განაცხადა გერმანიის მთავრობის ხელმძღვანელმა.

მან რუსული აქტივების ისეთი მასშტაბით გამოყენებას გაუწია რეკომენდაცია, რომელიც "უკრაინის სამხედრო მდგრადობას რამდენიმე წლით უზრუნველყოფს".

მერცმა ხაზი გაუსვა იმასაც, რომ ეს თანხა აუცილებლად მხოლოდ სამხედრო აღჭურვილობის შეძენას უნდა მოხმარდეს და არა უკრაინის ზოგადი ბიუჯეტის დაფინანსებას.

"ასეთმა ყოვლისმომცველმა პროგრამამ ასევე ევროპის თავდაცვის ინდუსტრიის გაძლიერებასა და გაფართოებას უნდა შეუწყოს ხელი. ეს როგორც ჩვენს კოლექტიურ უსაფრთხოებას, ისე ევროპულ სუვერენიტეტს ემსახურება," — განაცხადა გერმანიის კანცლერმა.

უკრაინული მედიის ცნობით, გაყინული რუსული აქტივების დიდი ნაწილი ევროპული, ამერიკული და ბრიტანული სახელმწიფო ობლიგაციებისგან შედგება, რომლებიც ბელგიაში მდებარე ევროპული ფასიანი ქაღალდების საცავში, Euroclear-ში ინახება. ბრიუსელი, მუშაობს, რათა მომავალი წლიდან ამ სახსრების ნაწილი გახსნას.