აშშ-ს სახელმწიფო დეპარტამენტის ავტორიზაციის აქტში "ქართული კოშმარის არაღიარების" შესწორების წინადადების შეტანა, რომელიც აშშ-ს მთავრობასა და ოფიციალურ პირებს ქართული ოცნების მთავრობის აღიარებას უკრძალავს, ოპოზიციონერი პოლიტიკოსი დიმიტრი ცქიტიშვილი გამოეხმაურა.

ცქიტიშვილის თქმით, ავტორიზაციის აქტში ასეთი შესწორების შეტანა ოცნებას ლეგიტიმაციის მოპოვების პერსპექტივას არ უტოვებს და მიუხედავად იმისა, რომ შესწორება კომიტეტის დონეზეა, მისი აზრით, განსხვავებული პოზიციები, კონგრესის რომელიმე პალატაში ან სახელმწიფო დეპარტამენტში, სავარაუდოდ, არ არსებობს.

"ავტორიზაციის აქტი ეს არის დაახლოებით 2-წლიანი პოლიტიკის გეგმა, ასე ვიტყოდი, სახელმწიფო დეპარტამენტის, რომელშიც ასეთი ფრაზის, ასეთი სიტყვების ჩაწერა პრაქტიკულად ანადგურებს ნებისმიერ პერსპექტივას ქართული ოცნების რაიმე ტიპის ლეგიტიმაციის მოპოვების. რა თქმა უნდა, ეს ჯერ კიდევ კომიტეტის დონეზეა, მაგრამ მე არ მგონია, რომ რაიმე განსხვავებული პოზიციები არსებობდეს, თუნდაც აშშ-ის კონგრესის რომელიმე პალატაში ან სახელმწიფო დეპარტამენტში, ან თეთრ სახლში", — განაცხადა დიმიტრი ცქიტიშვილმა "ფორმულას" ეთერში.

ევროპულ-ქართული ინსტიტუტის დამფუძნებელმა, გიორგი მელაშვილმა "ფორმულას" ეთერში აღნიშნა, რომ ეს სიგნალია ადმინისტრაციისთვის, რომ ქართულ ოცნებასთან "ნორმალური საქმის წარმოება გახდება შეუძლებელი."

"ქართული ოცნების აღიარება სერიოზული კითხვის ნიშნის ქვეშ დგება. ეს არ ნიშნავს იმას, რომ ეს შესწორება უკვე არის მიღებული — ჯერ უნდა დაამტკიცოს ქვედა პალატამ, შემდეგ ზედა პალატამ, თუმცა ის, რომ ავტორიზაციის აქტი — ფუნდამენტური დოკუმენტი, რომლითაც იმართება შეერთებული შტატების სახელმწიფო დეპარტამენტი, მასთან დაკავშირებით, ჟღერდება ასეთი ტიპის გაფრთხილება — ეს გვაჩვენებს იმას, რომ კონგრესის მხრიდან წნეხი შეერთებული შტატების ადმინისტრაციაზე გრძელდება. ორპარტიული მხარდაჭერა, რომელიც ჰქონდა "MEGOBARI აქტს", რომელიც გაიჭედა — ასევე არსებობს. ეს არის კონკრეტული სიგნალი ადმინისტრაციისადმი, რომ ქართულ ოცნებასთან "Buisness as usual" — ნორმალური საქმის წარმოება გახდება შეუძლებელი" — განაცხადა გიორგი მელაშვილმა.

ცნობისთვის, დღეს ამერიკელმა კონგრესმენმა, ჯო უილსონმა სოციალურ ქსელში გაავრცელა ინფორმაცია, რომლის მიხედვითაც სახელმწიფო დეპარტამენტის ავტორიზაციის აქტში მისი "ქართული კოშმარის არაღიარების" შესწორება მიიღეს.