ბრიუსელში დღეს ევროკავშირის მუდმივი წარმომადგენლების კომიტეტის (Coreper) რიგგარეშე სხდომა გაიმართება და ევროკავშირის 27 წევრი ქვეყნის ელჩებს რუსეთის წინააღმდეგ ევროკავშირის სანქციების ახალი, მე-19 პაკეტი წარედგინებათ. ინფორმაციას უკრიანული მედია ავრცელებს და წერს, რომ სხდომის მოწვევა უკვე დაუდასტურა ერთ-ერთმა დიპლომატმაც.

არსებული ცნობით, შეხვედრა კიევის დროით 13:30 საათზე დაიწყება.

სხვა დიპლომატიური წყაროების ინფორმაციით, ბრიუსელში ევროკავშირის ელჩების რიგგარეშე შეხვედრის მთავარი თემა ევროკომისიის მიერ რუსეთის წინააღმდეგ ახალი, მე-19 სანქციების პაკეტის პროექტის წარდგენა იქნება.

საერთაშორისო მედია წერს, რომ მანამდე ევროკავშირმა რუსეთის წინააღმდეგ სანქციების მე-19 პაკეტის ოფიციალური წარდგენა გადადო, რაც შეერთებული შტატების პრეზიდენტის მიერ სანქციების დაწესების სანაცვლოდ წამოყენებულმა პირობამ გამოიწვია. ტრამპმა ევროპისგან უფრო მკაცრი ზომების მიღება მოითხოვა.