ქართული ოცნების წევრი, თენგიზ შარმანაშვილი ჩეხეთის მიერ საქართველოს დიპლომატიური პასპორტებისთვის სავიზო რეჟიმის შემოღებას გამოეხმაურა. მისი თქმით, თუ საქართველოს ინტერესებში იქნება მათი ჩეხეთში წასვლა, ვიზებს მიაკითხავენ, წინააღმდეგ შემთხვევაში "არ ადარდებთ".

"ისინი რას ამბობენ, რომ ოფიციალური დელეგაცია თუ ჩავა იქ, ანუ — როდესაც შენ, როგორც კერძო პირი ისე კი არ მიდიხარ ჩეხეთში, არამედ როგორც ოფიციალური პირი — ასეთ შემთხვევაში მომაკითხე მე, რომ ჩაგირტყა ვიზაო. თუ ჩვენ ოფიციალურად ვინმეს მოგვიწევს ჩეხეთში წასვლა და ეს საქართველოს ინტერესების შესაბამისი იქნება და დაგვჭირდება, მივაკითხავთ. თუ არა და არ გვადარდებს. სანქცია არის, რომ საერთოდ არ გიშვებს იქ. ის ამას არ ამბობს, ის ამბობს, რომ აი, ოფიციალურად ჩემთან ჩამოსვლაც კი, ჩემი თანხმობის გარეშე არ იქნება", — თქვა თენგიზ შარმანაშვილმა.

ცნობისთვის, რამდენიმე საათის წინ ჩეხეთის საგარეო საქმეთა მინისტრმა იან ლიპავსკიმ გაავრცელა ინფორმაცია იმის შესახებ, რომ ჩეხეთმა საქართველოს დიპლომატიური და სამსახურებრივი პასპორტების მფლობელებისთვის ვიზის სავალდებულო რეჟიმი შემოიღო.