საქართველოს პროკურატურამ ე.წ. ციანიდის საქმის სასამართლო სხდომების ჩანაწერების მედიაში მოხვედრის საქმეზე გამოძიება დაიწყო. უწყებაში ამბობენ, რომ საქმეს გამოძიების მონაცემების გახმაურების ფაქტზე იძიებენ.

"ბოლო პერიოდში სხვადასხვა მედიასაშუალებებში არაერთხელ გავრცელდა მსჯავრდებულ გიორგი მამალაძის სისხლის სამართლის საქმის მასალები. აღნიშნულთან დაკავშირებით გამოძიების მონაცემების გახმაურების ფაქტებზე, საქართველოს სისხლის სამართლის კოდექსის 374-ე მუხლით გათვალისწინებული დანაშაულის ნიშნებით დაწყებულია გამოძიება და საქმეზე გამოძიებას აწარმოებს საქართველოს პროკურატურა", - უთხრა იმედს საქართველოს პროკურატურის პრესსამსახურის თანამშრომელმა, ნათია სუხიაშვილმა.

რამდენიმე დღის განმავლობაში ტელეკომპანია პირველი და რუსთავი 2 ე.წ. ციანიდის საქმის სასამართლო განხილვების ჩანაწერებს ასაჯაროებდნენ. საქართველოს პროკურატურამ ამ საქმეზე ბრალდებულის, დეკანოზ გიორგი მამალაძის ადვოკატებს გაუთქმელობის პირობა დაადებინა, რაც მათ საქმის დეტალებზე საჯაროდ საუბარს უკრძალავდათ.