ოცნების პარლამენტის თავმჯდომარე შალვა პაპუაშვილი "თანაინვესტირების ფონდის" ყოფილი ხელმძღვანელის, გიორგი ბაჩიაშვილის შესახებ The Guardian-ის სტატიას ჟურნალისტებთან საუბრისას გამოეხმაურა. მისი თქმით, ეს სტატია "შეკვეთილია", მასში "ფულია გადახდილი", რაც მედიაში "კორუფციის ერთ-ერთი მაჩვენებელია"

" ეს პირველი შემთხვევა არ არის, როდესაც The Guardian აქვეყნებს შეკვეთილ სტატიას — აშკარად შეკვეთილ სტატიას ბაჩიაშვილის მხრიდან. ეს კიდევ ერთხელ აჩვენებს, თუ რა მდგომარეობაა მედიაში, ევროპაში. ახლაც გავიხსენე მე ტრამპის სიტყვები, როდესაც ის Fake მედიაზე საუბრობს. მეინსტრიმ-მედია, რომელიც Fake მედიადაა ჩამოყალიბებული — ესაა დღევანდელი მდგომარეობა მედიის მხრივ ევროპაში, რაც მართლაც სავალალოა, როდესაც პირდაპირ ჩანს, რომ არის ფული გადახდილი სტატიაში. ამისი გამჟღავნება არ ხდება, შესაბამისად, ეს არის კორუფციის ერთ-ერთი მაჩვენებელი მედიაში," — თქვა შალვა პაპუაშვილმა ჟურნალისტებთან საუბრისას.

ცნობისთვის, The Guardian-მა პატიმრობაში მყოფ "თანაინვესტირების ფონდის" ყოფილ ხელმძღვანელ გიორგი ბაჩიაშვილზე სტატია გამოაქვეყნა. ბრიტანული გამოცემა წერს, რომ მას შემდეგ, რაც ბაჩიაშვილის დედასთან, მარინა რამაზაშვილთან ინტერვიუ გამოაქვეყნეს, სადაც ის ბიძინა ივანიშვილს აკრიტიკებს, ბაჩიაშვილის მშობლებს საბანკო ანგარიშები გაუყინეს. მარინა რამაზაშვილი ინტერვიუში აცხადებს, რომ მისი ვაჟი, გიორგი ბაჩიაშვილი, მილიარდერი პოლიტიკოსის, ბიძინა ივანიშვილის "ვენდეტის" მსხვერპლი გახდა.