"საიდან გამოგაქვთ დასკვნა, რომ 5 წელი მიესჯება? მაგას არც თქვენ განსაზღვრავთ, არც მე განვსაზღვრავ. მაგ გადაწყვეტილებას მიიღებს მოსამართლე, ამიტომ პატივი უნდა ვცეთ ყველამ კანონს", — ამის შესახებ თბილისის მერმა, კახა კალაძემ 23 წლის აქტივისტის, მეგი დიასამიძის დაკავებაზე საუბრისას. ის 9 სექტემბერს კალაძის შტაბთან ბანერის დაზიანებისთვის დააკავეს.

კალაძის თქმით, "არ არის საჭირო მივარდნები".

"არსებობს კანონი, რომელიც აუცილებლად აღსრულდება. რაც შეეხება პატიმრობა იქნება, სახლში გაშვება იქნება, ამას წყვეტს მოსამართლე. ... ფაქტი არის ძალიან ცუდი. არც ერთ რადიკალს არ უნდა მიეცეს შესაძლებლობა.

...[ბანერზე გაკვრაზე] ნებართვა გვქონდა. ამას მუნიციპალიტეტისგან ნებართვა არ სჭირდება. მას სჭირდება მფლობელის ნებართვა. ეს, რა თქმა უნდა ჩვენ გვაქვს, ნაქირავები გვაქვს ფართი, ნაქირავები გვაქვს იმისთვის, რომ საარჩევნო შტაბი გაიხსნას და ის პირობა, რომ ბანერები გაიკრას, პრობლემას არ წარმოადგენს.

კანონი ყველას წინაშე ერთნაირად მუშაობას. ძალიან გულდასაწყვეტია. არავის დაჭერა არ მიხარია ყველამ მაქსიმალურად უნდა შევეცადოთ თავი შევიკავოთ ასეთი ფაქტებისგან. ძალადობა ცუდია.

...საიდან გამოგაქვთ დასკვნა, რომ 5 წელი მიესჯება? მაგას არც თქვენ განსაზღვრავთ, არც მე განვსაზღვრავ. მაგ გადაწყვეტილებას მიიღებს მოსამართლე, ამიტომ პატივი უნდა ვცეთ ყველამ კანონს. არ არის საჭირო მივარდნები. შტაბი ხომ არ მივარდნია, ან შტაბს თვითონ ხომ არ დაუზიანებია? შეიძლება ვიღაცას აქვს პროტესტი. გააპროტესტე, ვინმე ხომ არ გიშლის პროტესტს? მაგრამ კანონის ფარგლებში უნდა იყოს ყველაფერი", — განაცხადა კახა კალაძემ 23 წლის აქტივისტის, მეგი დიასამიძის დაკავებაზე საუბრისას. ის 9 სექტემბერს კალაძის შტაბთან ბანერის დაზიანებისთვის დააკავეს.

23 წლის მეგი დიასამიძე 9 სექტემბერს კახა კალაძის ბანერზე გაკეთებული წარწერისთვის — "რუსული რეჟიმი" დააკავეს. მის წინააღმდეგ საქმე სსკ-ის 187-ე მუხლითაა აღძრული, რაც სხვისი ნივთის დაზიანებას ან განადგურებას გულისხმობს. ეს მუხლი ჯარიმას, საზოგადოებისთვის სასარგებლო შრომას, შინაპატიმრობას 6 თვიდან 2 წლამდე, ან 1-დან 5 წლამდე პატიმრობას ითვალისწინებს.

მეგი დიასამიძის დაკავების შესახებ ინფორმაცია თავდაპირველად მისმა დამ, ნელი დიასამიძემ სოციალურ ქსელში გაავრცელა. მან დაწერა, რომ "რეჟიმი ამ მეთოდებით აქტივისტების დაშინებას ცდილობს".

"დაკავებულია ჩემი და და თანამებრძოლი მეგი დიასამიძე.

რეჟიმი ცდილობს, ამ მეთოდებით შეგვაშინოს, რის გამოც კიდევ უფრო მეტად უნდა ვიბრძოლოთ, რომ მეგიც და ყველა პოლიტიკური ტყვე თავისუფალი იყოს წლის ბოლომდე!

დამხობა რეჟიმს!", — დაწერა სოციალურ ქსელში ნელი დიასამიძე.