გუშინ, 8 სექტემბერს, მელიქიშვილის გამზირზე გამართულ აქციაზე კახა კალაძის შტაბის წევრებისა და ოცნების მხარდამჭერების ძალადობის შედეგად დაშავებული 4 ადამიანიდან 2 ინგოროყვას კლინიკიდან გაწერეს. ამის შესახებ ინგოროყვას კლინიკის კლინიკური დირექტორი პროფესორი კახა ჭელიძე "ფორმულასთან" აცხადებს. მისი თქმით, აქციაზე დაშავებულ უნგრელ ჟურნალისტს, ლასლო მეზეშს თავის არეში აქვს დაზიანებები მიყენებული.

"შემოვიდა ოთხი პაციენტი, აქედან ორი იყო თვითდინებით, შესაბამისად ამ თვითდინებით შემოსული პაციენტების მდგომარეობა არ მოითხოვდა ჰოსპიტალიზაციას მსუბუქი დაზიანებების გამო. რაც შეეხება ჰოსპიტალიზებულ ორ პაციენტს, მათი მდგომარეობაც შემოსვლის მომენტში და ახლაც დამაკმაყოფილებელი გახლავთ. მიმდინარეობს დაკვირვება პაციენტებზე, რაც შეეხება გაწერის გადაწყვეტილებას, ალბათ ხვალ მივიღებთ.

მსუბუქი დაზიანებებია, მე პერსონალურ მონაცემთა დაცვის მოთხოვნებიდან გამომდინარე, მხოლოდ იმ ინფორმაციას გიმჟღავნებთ, რაც პაციენტებმა თავად განაცხადეს.

მსუბუქი დაზიანება აქვს სახის არეში, და მსუბუქი დაზიანება მტევნის არეში," — განაცხადა კახა ჭელიძემ.

გუშინ, 8 სექტემბერს მელიქიშვილის გამზირზე, კახა კალაძის საარჩევნო შტაბთან, "ოცნების" მხარდამჭერები ფიზიკურად დაუპირისპირდნენ იქ შეკრებილ მოქალაქეებს, აქტივისტებსა და ჟურნალისტებს. ე.წ. ტიტუშკებმა იძალადეს "პუბლიკის", "ნეტგაზეთის" და ასევე უნგრელ ჟურნალისტ ლასლო მეზეშზე. ის სასწრაფო დახმარების ეკიპაჟმა კლინიკაში გადაიყვანა. ამ დრომდე არც ერთი მოძალადე დაკავებული არ არის.

შინაგან საქმეთა სამინისტრომ მელიქიშვილის გამზირზე მომხდარ დაპირისპირებასთან დაკავშირებით გამოძიება ჯგუფური ძალადობის მუხლოთ დაიწყო, თუმცა ამ დრომდე არავინ დაუკავებიათ.

ასევე იხილეთ: