7 წლიანი პაუზის შემდეგ ლეგენდარულმა ჯგუფმა Radiohead-მა ევროპის ტურნე დააანონსა.

იხილეთ: დეტალები ტურნეს შესახებ

ამ სიახლემ ინტერნეტსივრცე მოიცვა, უამრავი ძველი და ახალი ფანი გაახარა, რომლებიც მოუთმენლად ელიან ბილეთების ყიდვასა და ინგლისური ბენდის კონცერტზე დასწრებას. თუმცა ამ ყველაფერთან ერთად ამბავმა უარყოფითი გამოხმაურებაც დაიმსახურა — საზოგადოების ნაწილი Radiohead-სა და მათ ახალ ტურნეს ბოიკოტს უცხადებს.

ბოიკოტის მიზეზად სახელდება Radiohead-ის წევრების დუმილი პალესტინის საკითხზე და მათი წარსული კავშირები ისრაელთან. ბენდის გიტარისტმა ჯონი გრინვუდმა 2023 წელს ისრაელელ მუსიკოს დუდუ ტასასთან ერთად თელ-ავივში მუსიკალური ალბომი ჩაწერა. ევროტური, რომელიც ამ ალბომს ეძღვნებოდა, ისრაელსა და ღაზას შორის კონფლიქტის დაწყების გამო გაუქმდა.

2024 წელს ჯონიმ მონაწილეობა მიიღო ისრაელში გამართულ დემონსტრაციებში, რომლებიც პრემიერ-მინისტრ ბენიამინ ნეთანიაჰუს გადადგომასა და ჰამასის მიერ დატყვევებული ადამიანების გათავისუფლებას მოითხოვდა. გრინვუდმა ტასასთან ერთად თელ-ავივში კონცერტიც გამართა, რამაც პალესტინის მხარდამჭერების უკმაყოფილება გამოიწვია. 2025 წელს მოსალოდნელი პროტესტისა და აქტივისტების ზეწოლის გამო ბრიტანეთში გრინვუდისა და ტასას ორი კონცერტი გაუქმდა.

ისრაელი არა მხოლოდ ჯონი გრინვუდისთვის, არამედ მთელი ბენდისთვის რთული საკითხი აღმოჩნდა. ბენდმა წინა ტურნეს დროს — 2017 წლის ივლისში თელ-ავივში კონცერტი გამართა, იმის მიუხედავად, რომ საზოგადოების ნაწილი მისი გაუქმებისკენ მოუწოდებდა. ამ ფაქტის შესახებ Radiohead-ის მომღერალმა ტომ იორკმა განაცხადა: "ქვეყანაში კონცერტის ჩატარება მისი მთავრობის მხარდაჭერას არ ნიშნავს".

2024 წელს მელბურნში ტომის სოლო-კონცერტი პალესტინის მხარდამჭერი შეძახილების ფონზე შეწყდა. იორკმა მაყურებელს უთხრა:

აქ ამოდი და ისე მითხარი… მანდ მშიშრულად დგომის ნაცვლად სცენაზე ამოდი და მითხარი, რისი თქმაც გინდა.

მსმენელმა კი უპასუხა:

რამდენი ბავშვი უნდა მოკვდეს იმისთვის, რომ ღაზაში მიმდინარე გენოციდი დაგმო?

ინციდენტის შემდეგ ტომ იორკმა სცენა დროებით დატოვა. იხილეთ ვიდეო:

2025 წლის მაისში ტომმა საჯაროდ განაცხადა, რომ ნეთანიაჰუ და მისი მთავრობა უნდა შეჩერდნენ, თუმცა ხაზი გაუსვა იმასაც, რომ "ჰამასი საკუთარი ხალხის ტანჯვას თავის სასარგებლოდ იყენებს". იორკმა განმარტა, რომ მელბურნის კონცერტი არ მიიჩნია ჰუმანიტარულ კატასტროფაზე საუბრის შესაფერის დროდ და ძალიან გაუკვირდა, რომ მისი დუმილი ხალხმა კონფლიქტში თანამონაწილეობად აღიქვა. მომღერლის თქმით, თავისთავად ცხადი უნდა ყოფილიყო მისი მუსიკიდან, რომ ის ექსტრემიზმსა და დეჰუმანიზაციას არასდროს დაუჭერდა მხარს.

ივლისში ბენდის გიტარისტმა ედ ო’ბრაიენმა განაცხადა: "ჩემი ძმები [ბენდის წევრები] შეძრწუნებულები არიან ღაზაში მიმდინარე მოვლენებით. ის, რომ მუდმივად სოციალურ ქსელებში არ წერენ ამის შესახებ და ზუსტად იმ სიტყვებს არ ამბობენ, რომლის მოსმენაც ზოგიერთ ადამიანს უნდა, არ ნიშნავს, რომ ეს ყველაფერი არ ადარდებთ".

Radiohead-ის ახალი ტურის ოფიციალურ გამოცხადებამდე, პალესტინურმა კამპანიამ ხალხს ბენდის ბოიკოტისკენ მოუწოდა:

„მაშინაც კი, როცა ღაზაში პალესტინელთა გენოციდი ყველაზე მძიმე ფაზაში შევიდა, Radiohead დუმილს აგრძელებს. ამასთან ერთად, ჯგუფის ერთ-ერთი წევრი მუდმივად არღვევს ჩვენი ბოიკოტის ხაზს და გენოციდის ადგილთან ახლოს, ისრაელელ მუსიკოსთან ერთად კონცერტებს მართავს“ – ნათქვამია განცხადებაში.

ორგანიზაცია კიდევ ერთხელ მოუწოდებს მსმენელსა და თანამოაზრეებს, რომ Radiohead-ის კონცერტებს, მათ შორის დაგეგმილ ტურნესაც, ბოიკოტი გამოუცხადონ, სანამ ჯგუფი მკაფიოდ არ გაემიჯნება, სულ მცირე, გრინვუდის მიერ გადადგმულ ნაბიჯებს.