2 სექტემბერს რუსთაველის გამზირზე სისხლის სამართლის წესით დაკავებული მიხეილ ლეშკაშელის ადვოკატის, გიორგი ყავლაშვილის თქმით მისი დაცვის ქვეშ მყოფი იარაღის კოლექციონერია და რუსთაველზე მიმდინარე აქციასთან კავშირი არ აქვს.

ადვოკატი აცხადებს, რომ დაკავებამდე ლეშკაშელი სანადიროდ მიდიოდა.

"ჩვენი ინფორმაციით, გადაწყვეტილი ჰქონდა, სანადიროდ წასვლა… კოლექციონერია, იარაღებს აგროვებს. აბსოლუტურად ყველა კანონიერი და რეგისტრირებულია და უბრალოდ მოხვდა ამ ადგილზე, მოუწია მანქანიდან გადმოსვლა. გზაც გადაკეტილი იყო და იქიდან გამომდინარე, რომ გარშემო ბევრი ხალხი ტრიალებდა, თავად ჩათვალა, რომ უფრო უსაფრთხო იქნებოდა, იარაღი, რომლის ტარების უფლებაც გააჩნდა, თან ჰქონოდა.
ბატონ მიშას აღმოაჩნდა 22 რეგისტრირებული, გაფორმებული იარაღი. აქვს ადამიანს იარაღების სიყვარული და ჰობი.

მამამისი სამხედრო პირი, მაღალჩინოსანი იყო და ამ ადამიანს ჰქონდა მისი გარდაცვალების შემდეგ დატოებული "გეკოს" თოფი, რომელსაც აქვს ე.წ. ხრახნი…

…ბატონი მიხეილი ბრალს გაეცნო, ჩვენთან ერთად, ვუთხარით რასაც ედავებოდნენ. ამ ადამიანს რაიმე სახის კავშირი აქციასთან ნამდვილად არ ჰქონია," — განაცხადა ადვოკატმა გიორგი ყავლაშვილმა TV პირველთან.

პროკურატურამ დაკავებულს ბრალდება სანადირო ცეცხლსასროლი იარაღის მართლსაწინააღმდეგო შეძენის ან შენახვის (236-ეს პირველი ნაწილი) მუხლით წარუდგინა.

შინაგან საქმეთა სამინისტრო 3 სექტემბერს გავრცელებულ ინფორმაციაში წერდა, რომ ეს პირი "აქციის მიმდინარეობისას აქციის მონაწილეებს შორის ცეცხლსასროლი იარაღით გადაადგილდებოდა" და გამოძიება ცეცხლსასროლი იარაღის მართლსაწინააღმდეგო ტარების მუხლითაც მიმდინარეობდა.