2 სექტემბერს, რუსთაველის გამზირზე ადმინისტრაციული წესით დაკავებული აქტივისტების ნაწილი, 48-საათიანი ადმინისტრაციული დაკავების ვადის ამოწურვის შემდეგ, სასამართლოს დარბაზიდან გაათავისუფლეს. პროცესებზე შესვენებები გამოცხადდა, რის შემდეგაც, სხდომა განახლდება.

დარბაზი დატოვეს — ალბი კორძაიამ, შუშანა მაცაბერიძემ, მარიკო ცომაიამ, თათია აფრიამაშვილმა, რუსუდან მაღრაძემ, ბექა პაპაშვილმა და მარიამ უძილაურმა, ხოლო კიდევ ერთ დაკავებულს, თამარ ლორთქიფანიძეს 5000-ლარიანი ჯარიმა დაეკისრა.

დაკავებულებიდან ერთ-ერთმა, ალბი კორძაიამ გათავისუფლების შემდეგ პოლიციის მხრიდან ძალადობაზე ისაუბრა.

"გზის გადაკეტვის შემდეგ, აქტივისტები მიმოვიფანტეთ. რამდენიმე აქტივისტმა ერთ-ერთ კაფეს შევაფარეთ თავი. რამდენიმე კილომეტრში კივილი გავიგონე, რა თქმა უნდა, გავიქეცი და ოპერის მოპირდაპირედ საპოლიციო მანქანა დავინახე. ჩემი ნაცნობი აქტივისტები ყვიროდნენ, მივხვდი, რომ დააკავეს...

როცა ვამბობდი, ხელი გამიშვითო, ერთი პოლიციელი ზურგიდან მწვდა და მანქანაში ჩამაგდო. ჯერ შუშებიან შენობაში, მერე კი თავი ამოვყავით ახალციხის იზოლატორში მე, თათია აფრიამაშვილმა, შუშანა მაცაბერიძემ და ნენე გაბლაიამ. გოგოები საშინლად დალურჯებულები არიან. ჩემს შემთხვევაში ეს იყო უხეში დაკავება და სრულიად არალეგიტიმური, უბრალოდ იმის გამო, რომ პოლიციის "მარშუტთან" ვიდექი, შემაგდეს მანქანაში. ჩამიწერეს მუხლები, რომ ვბილწსიტყვაობდი, შეურაცხყოფას ვაყენებდი, რაც ასე არ ყოფილა," — განაცხადა ალბი კორძაიამ (კომენტარს IPN ავრცელებს).

ცნობისთვის, 2 სექტემბერს, რუსთაველის გამზირზე ადმინისტრაციული წესით 23 ადამიანი დააკავეს. შსს განცხადებით, ისინი პოლიციას არ ემორჩილებოდნენ.