საგამოძიებო კომისიის ანგარიშთან დაკავშირებით ოცნების პარლამენტმა დადგენილების პროექტს უყარა კენჭი, რომელსაც მხარი ოცნების პარლამენტის 85-მა დეპუტატმა დაუჭირა.

ფრაქცია ქართული ოცნების თავმჯდომარის, ირაკლი კირცხალიას თქმით, ოცნების პარლამენტის ე.წ. დროებითი საგამოძიებო კომისიის 460-გვერდიანი დასკვნის საფუძველზე მომზადდება მყარი და საფუძვლიანი სარჩელი, რომელიც გაიგზავნება საკონსტიტუციო სასამართლოში.

"გუშინ თეა წულუკიანმა წარმოადგინა შემაჯამებელი დასკვნა, 460-გვერდიანი დასკვნის დოკუმენტიდან. საგამოძიებო კომისიამ გასწია კოლოსალური შრომა. საზოგადოების სახელით, მინდა, ამ ტრიბუნიდან კომისიას უღრმესი მადლობა გადავუხადო, რადგან უმნიშვნელოვანესი პროცესი წარიმართა საქართველოს პარლამენტში. თითოეული ეს მიმართულება არის აღწერილი 460-გვერდიან დასკვნაში. პროცესს როდესაც ვადევნებდით თვალყურს, ეს იყო ლუსტრაცია და მხილება, ხშირ შემთხვევაში, თვითმხილება ამ რეჟიმის წარმომადგენლების მხრიდან, რეალურად რას ემსახურებოდნენ დემოკრატიის სახელით და დემოკრატიის შუქურის საფარის ქვეშ. რეალურად, ვინ ესაუბრებიან დღეს ჩვენს ახალგაზრდობას დემოკრატიის და დემოკრატიის პრინციპების სახელით აქ, რუსთაველის გამზირზე თუ სხვაგან, თავიანთ გათითოკაცებულ პარტაქტივს — ხშირ შემთხვევაში, გადაღებილ-გადანომრილი მათივე პოლიტიკური მემკვიდრეები", — განაცხადა ირაკლი კირცხალიამ.

მისი თქმით, "საზოგადოება პირდაპირ ეთერში, საკონსტიტუციო სასამართლოში დააკვირდება იმ პროცესს, რასაც აკვირდებოდა თვეების მანძილზე".