სუს-ის ახლად დანიშნულმა ხელმძღვანელმა, მამუკა მდინარაძემ ბრიფინგზე აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძესთან დაკავშირებულ კითხვას უპასუხა. მისი თქმით, სამართალდამცავი ორგანოს ხელმძღვანელის ამპლუაში მას საქმის უფრო მეტ დეტალზე ექნება წვდომა, მაგრამ ამ თემასთან დაკავშირებულ სპეკულაციებს "ამორალური" უწოდა.

"არსებობს რაღაცა ჩარჩო, რის იქით დეპუტატი გადის, რომელიც საკმაო ინფორმაცია აქვს, მაგრამ არა იმდენი, რამდენიც სამართალდამცავი ორგანოს ხელმძღვანელს. მე ამ ფარგლებში საკმაოდ დიდი ინფორმაცია მქონდა, აწი, ალბათ, უფრო მეტს გავიგებ, მაგრამ მინდა გითხრათ — თორნიკე რიჟვაძის საქმესთან დაკავშირებით ერთადერთი საფუძველი იმ სპეკულაციებისა, რაც გვესმის არის ამორალურობა, რომლის ფარგლებშიც, გარკვეული პერსონალური თუ სხვა საკითხების გათვალისწინებით, საგამოძიებო ორგანოები ასეთ რაღაცებს ვერ ამბობენ...თქვენ სპეკულირებდით იმიტომ, რომ იცით, რომ ამ პერსონალურ საკითხებს მორალურად გამართული მმართველი გუნდი არ და ვერ გაახმოვანებს.

დიახ, მე მის [თორნიკე რიჟვაძის] ოჯახის წევრებთან კონტაქტზე გავედი. ფიზიკურად არ მინახავს. თორნიკე არის ადამიანი, რომელსაც ძალიან ბევრი და დიდი დამსახურება აქვს საკუთარი რეგიონის, მმართველი გუნდის წინაშე. ის არის ჩვენი მეგობარი. როგორც თქვენ აპელირებდით: "ახლო მეგობარი", "დღე და ღამე ერთად იყვნენ", ისე არა, მაგრამ, ჩვენი მეგობარია. მისი სურვილია, რომ გარშემომყოფებთან, თითქმის არავისთან აქვს ურთიერთობა. აქვს ისეთი მდგომარეობა, რომლის გამო, ჩვენ ამას ყველა გაგებით ვეკიდებით ამას. უფრო სიღრმეში ვერ შევდივართ პერსონალური საკითხების გამო. ამით ნუ ისარგებლებთ მომავალში, ამორალური იქნება ამით სარგებლობა" — თქვა მამუკა მდინარაძემ.

ცნობისთვის, ოცნების ლიდერი მამუკა მდინარაძე სუს-ის ახალი უფროსი გახდა. ამ პოსტზე მდინარაძის კანდიდატურას ოცნების პარლამენტის 85-მა წევრმა დაუჭირა მხარი.