ფრანგული ავიაკომპანია Air France-ის სამგზავრო თვითმფრინავის ერთი ძრავი ჰაერში იმ დროს დაიშალა ნაწილებად, როცა ის პარიზიდან ლოს-ანჯელესისკენ მიფრინავდა. თვითმფრინავის ბორტზე 520 ადამიანი იმყოფებოდა, თუმცა არავინ დაშავებულა. შემთხვევა 30 სექტემბერს მოხდა.

მსოფლიოში ყველაზე დიდი სამგზავრო თვითმფრინავი, ორსართულიანი ეარბას A380, რეისის ნომრით 066 კანადის საჰაერო სივრცეში იმყოფებოდა, როცა მგზავრებმა შენიშნეს, თუ როგორ დაიშალა ნაწილებად თვითმფრინავის ოთხი ძრავიდან ერთ-ერთი. პილოტების გუნდმა თვითმფრინავის დასმა ავარიულად მოახერხა ნიუფაუნდლენდში არსებულ სამხედრო აეროპორტში. როგორც ავიაკომპანიამ განაცხადა, ინციდენტისა და ევაკუაციის დროს არავინ დაშავებულა.

Airbus A380

ეარბას A380 პოპულარული თვითმფრინავია დიდი ავიაკომპანიებში. ეარ ფრანსი სულ 10 ასეთ სამგზავრო ლაინერს ფლობს.

2017 წლის 30 სექტემბრის ინციდენტი არის მეორე სერიოზული შემთხვევა ეარბას A380-ის ისტორიაში. 2010 წელს ავსტრალიური ავიაკომპანია Qantas-ის A380-ის ძრავი ასევე დაზიანდა სინგაპურის აეროპორტში აფრენიდან ცოტა ხანში. გამოცდილმა პილოტებმა მაშინ სასწაულებრივად შეძლეს ლაინერის უსაფრთხოდ დასმა და ბორტზე მყოფი ასობით ადამიანის გადარჩენა.