თბილისის საქალაქო სასამართლოში აჭარის მთავრობის ყოფილი თავმჯდომარის, თორნიკე რიჟვაძის თვითმკვლელობის მცდელობის საქმეზე, ცეცხლსასროლი იარაღის დაუდევრად შენახვაში ბრალდებულის, საზღვაო ტრანსპორტის სააგენტოს ყოფილი დირექტორის, ალექსი ახვლედიანის სასამართლო პროცესი მიმდინარეობს.

მან პროცესის დაწყებამდე ჟურნალისტებთან, სხვა საკითხებთან ერთად, თორნიკე რიჟვაძის ჯანმრთელობის მდგომარეობაზეც ისაუბრა. ახვლედიანის თქმით, მას "2-თვიანი საკმაოდ მკაცრი ფსიქოლოგიური მკურნალობა დაუნიშნეს, კვირის ბოლოს გაუკეთებენ თვალის ოპერაციას".

"მასთან კომუნიკაცია არის საკმაოდ შეზღუდული ოჯახის წევრებისთვისაც იმიტომ, რომ როგორც მე მაქვს ინფორმაცია ოჯახიდან, დაუნიშნეს 2-თვიანი საკმაოდ მკაცრი ფსიქოლოგიური მკურნალობა, მხოლოდ ცოტა ხნით ბავშვებს აქვთ შესვლის უფლება, ტელეფონი და რაიმე მსგავსი მას არ აქვს და ბოლო ინფორმაციით, გუშინწინდელი ინფორმაციით, ალბათ, კვირის ბოლოს, როგორც გითხარით მიუნხენის პრობლემა თვალის, მან უფრო გამწვავება გამოიწვია, ეტყობა ამ სტრესის შემდეგ და ალბათ, ამ დღეებში, კვირის ბოლოს იქვე თურქეთშივე გაუკეთებენ თვალის ოპერაციას.

იქ ადგილობრივი ფსიქოლოგების ჯგუფი ემსახურება როგორც ვიცი, აუკრძალეს ამ 2-თვიანი კურსის დასრულებამდე ყველანაირი კომუნიკაცია ყველასთან", — განაცხადა ალექსი ახვლედიანმა "ტვ პირველთან".

2025 წლის 7 ივლისს, საგარეჯოს "ჯეოჰოსპიტალსში" აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე შეიყვანეს, რომელსაც გულმკერდის არეში ცეცხლნასროლი ჭრილობა აღენიშნებოდა. შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს. ამჟამად ის თურქეთის ერთ-ერთ კლინიკაში მკურნალობს.

რაც შეეხება ლექსი ახვლედიანს, ის 7 ივლისს, აჭარის ავტონომიური რესპუბლიკის ყოფილი თავმჯდომარის, თორნიკე რიჟვაძის თვითმკვლელობის მცდელობის საქმეზე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით, დააკავეს. 8 ივლისს კი 30 000-ლარიანი გირაოს სანაცვლოდ სასამართლო დარბაზიდან გაათავისუფლეს.