აშშ-ის სპეციალურმა წარმომადგენელმა, სტივ უიტკოფმა განაცხადა, რომ ის მიმდინარე კვირაში ნიუ-იორკში უკრაინის წარმომადგენლებს შეხვდება. მან ასევე აღნიშნა, რომ ვაშინგტონი რუსეთთან საუბარს აგრძელებს, რადგან შეერთებული შტატები ცდილობს დაასრულოს რუსეთის ომი უკრაინაში. ინფორმაციას Reuters ავრცელებს.

"მიმდინარე კვირაში ვხვდები უკრაინელებს. ასე რომ, ნიუ-იორკში მათთან შეხვედრას ვგეგმავ და ეს დიდი სიგნალია. რუსებთან ყოველდღიურად ვსაუბრობთ," — განაცხადა უიტკოფმა Fox News-ის გადაცემაში Special Report with Bret Baier.

უიტკოფის თქმით, მისი აზრით, რუსეთის პრეზიდენტი ვლადიმირ პუტინი ცდილობს ომის დასრულებას.

"ვფიქრობ, ის [პუტინი] კეთილი ნებით შეეცადა დიალოგის დაწყებას. ნამდვილად ასე იყო ალასკის სამიტზე. მაგრამ ეს ძალიან რთული კონფლიქტია,"— აღნიშნა მან.

"ვფიქრობ, შესაძლოა საბოლოოდ ორმხრივი შეხვედრაც ვიხილოთ," — თქვა უიტკოფმა. "ჩემი პირადი აზრია, რომ შეთანხმების მისაღწევად პრეზიდენტი აუცილებლად უნდა იჯდეს მოლაპარაკების მაგიდასთან."

Reuters-ის ცნობით, უკრაინა კატეგორიულად ეწინააღმდეგება რაიმე ტერიტორიების იურიდიულად რუსეთისადმი გადაცემას, თუმცა არაოფიციალურად აღიარებს, რომ, დიდი ალბათობით, მოუწევს გარკვეული ფაქტობრივი ტერიტორიული დანაკარგების მიღება.