წუხელ, კასპიის ზღვაში, დაღესტნის სანაპიროსთან, საქართველოს საზღვრიდან – 131 კმ-ში, 5.5 მაგნიტუდის მიწისძვრა მოხდა. ბიძგები ადგილობრივი დროით 23:33 საათზე დააფიქსირა.

სეისმოლოგიური აქტივობის მონიტორების ცნობით, ბიძგები იგრძნობოდა კასპიის ზღვის დასავლეთით მდებარე მთელ რეგიონში, მათ შორის ირანში, აზერბაიჯანში, სომხეთსა და საქართველოში.

მიწისძვრის სავარაუდო ეპიცენტრი დაახლოებით 10 კმ სიღრმეზე იყო. EMSC-ის ინფორმაციით, ის ქალაქ დერბენტიდან ჩრდილოეთით დაახლოებით 50 კმ-ში და ქალაქ იზბერბაშიდან 30 კმ-ში მდებარეობდა.

თავდაპირველად, მაგნიტუდა 6.0-ად შეფასდა, შემდეგ კი 5.5-მდე შეიცვალა. აშშ-ის გეოლოგიური სამსახური (USGS) მას 5.4 მაგნიტუდად აფასებს.

სოციალურ ქსელში წერენ, რომ ბიძგები საქართველოში, მათ შორის თბილისშიც იგრძნობოდა.