გუშინ, 17 აგვისტოს, რუსთაველის გამზირზე მიმდინარე პროევროპულ აქციაზე დაკავებული ორი აქტივისტი — ლადო ბეროზაშვილი და ზურა მენთეშაშვილი, რომლებიც დიღმის იზოლატორში არიან გადაყვანილები, ადვოკატმა მოინახულა.

დაკავებულების ინტერესების დამცველი აცხადებს, რომ ერთ-ერთ მათგანს ჯანმრთელობის პრობლემა აქვს და ამის შესახებ შესაბამის ორგანოებს მიაწვდიან ინფორმაციას, რათა მან "ხელწერილით დატოვოს იზოლატორი"

ადვოკატის განცხადებით, დაკავებულების სასამართლო პროცესი ჯერ არ ჩანიშნულა.

"გადაკეტვის შემდეგ ცდილობდნენ, რომ გზა გაეთავისუფლებინათ. ამ დროს დააკავეს პირველი ბატონი ზურა, ხოლო წინააღმდეგობის გაწევის დროს, რადგან უნდოდათ, რომ ბატონი ზურა არ გადაეყვანა პოლიციას, ამ დროს უკვე ლადოც გადაიყვანეს და დააკავეს. თუმცა აქ არის მნიშვნელოვანი და გასათვალისწინებელი ის ფაქტი, რომ ბატონ ზურას ჯანმრთელობის მდგომარეობის პრობლემები აქვს. მივაწოდებთ ინფორმაციას შესაბამის ორგანოებს, რომ გაითვალისწინონ. იქნებ ხელწერილით დატოვოს იზოლატორი, იმიტომ, რომ ამის გარემოებები არსებობს რეალურად. გადაყვანის დროს პოლიციის მხრიდან რაიმე გადაცდომა არ დაფიქსირებულა, ამას ორივე აღნიშნავს და ელოდებიან სასამართლო სხდომებს, როდის გაიმართება. ჯერ არცერთის პროცესი არ არის ჩანიშნული, რამდენადაც ჩემთვის ცნობილია," — განუცხადა ადვოკატმა TV პირველს.

შსს-ში აცხადებენ, რომ ორივე აქტივისტი ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციელის მოთხოვნისადმი დაუმორჩილებლობა) მუხლებითაა დაკავებული.

სოციალურ ქსელში მალევე გავრცელდა დაკავების ვიდეოკადრებიც.