უკრაინის პრეზიდენტი ვოლოდიმირ ზელენსკი ვაშინგტონში ჩავიდა. ინფორმაციას ზელენსკი სოციალურ ქსელში ავრცელებს.

დღეს, 18 აგვისტოს, უკრაინის პრეზიდენტი ევროპელ ლიდერებთან ერთად დონალდ ტრამპს შეხვდება.

ვოლოდიმირ ზელენსკის განცხადებით, მშვიდობა უნდა იყოს ხანგრძლივი და არა ისე, როგორც წლების წინ იყო, როდესაც უკრაინა იძულებული გახდა ყირიმი და დონბასის ნაწილი დაეთმო, რაც პუტინმა ახალი შეტევისთვის პლაცდარმად გამოიყენა.

"მე უკვე ჩავედი ვაშინგტონში, ხვალ პრეზიდენტ დონალდ ტრამპს ვხვდები. ხვალ ასევე გავესაუბრებით ევროპელ ლიდერებს. მადლობელი ვარ პრეზიდენტ დონალდ ტრამპის მოწვევისთვის. ყველას გვაერთიანებს ძლიერი სურვილი, რომ ეს ომი სწრაფად და საიმედოდ დასრულდეს. მშვიდობა კი უნდა იყოს ხანგრძლივი. არა ისე, როგორც წლების წინ იყო, როდესაც უკრაინა იძულებული გახდა ყირიმი და ჩვენი აღმოსავლეთის ნაწილი — დონბასის ნაწილი — დაეთმო და პუტინმა ეს უბრალოდ ახალი შეტევისთვის პლაცდარმად გამოიყენა. ან როდესაც უკრაინას 1994 წელს ე.წ. "უსაფრთხოების გარანტიები" მიეცა, მაგრამ მათ არ გაამართლეს. რა თქმა უნდა, ყირიმი მაშინ არ უნდა დაეთმო, ისევე როგორც უკრაინელებმა არ დათმეს კიევი, ოდესა და ხარკოვი 2022 წლის შემდეგ. უკრაინელები იბრძვიან თავიანთი მიწისთვის, დამოუკიდებლობისთვის. ახლა ჩვენი ჯარისკაცებს წარმატებას აღწევენ დონეცკისა და სუმის ოლქებში.

დარწმუნებული ვარ, რომ ჩვენ დავიცავთ უკრაინას, ეფექტურად უზრუნველვყოფთ უსაფრთხოებას და ჩვენი ხალხი ყოველთვის მადლიერი იქნება პრეზიდენტ ტრამპის, ყველა პარტნიორისა და მოკავშირის მხარდაჭერისა და ფასდაუდებელი დახმარებისთვის. რუსეთმა უნდა დაასრულოს ეს ომი, რომელიც თავად დაიწყო. იმედი მაქვს, რომ ამერიკასთან და ჩვენს ევროპელ მეგობრებთან ერთად, ერთობლივი ძალისხმევით რუსეთს ნამდვილ მშვიდობას ვაიძულებთ. გმადლობთ!", — წერს ზელენსკი.

პარასკევს, 15 აგვისტოს, რუსეთის მიერ უკრაინაში შეჭრის შემდეგ, ალასკაში აშშ-სა და რუსეთის პრეზიდენტებს შორის პირველი შეხვედრა გაიმართა. დონალდ ტრამპმა და ვლადიმერ პუტინმა მოლაპარაკებები ანკორიჯში, ელმენდორფ-რიჩარდსონის საჰაერო ბაზაზე გამართეს.

რუსეთის პრეზიდენტ ვლადიმერ პუტინთან შეხვედრის შემდეგ, აშშ-ის პრეზიდენტმა დონალდ ტრამპმა FoX News-თან განაცხადა, რომ დღეს "10-დან 10-ით" აფასებს.

ტრამპმა განაცხადა, რომ იწყება მზადება რუსეთისა და უკრაინის ხელმძღვანელების შეხვედრისთვის. მისივე თქმით, შეთანხმების მიღწევის ალბათობა "საკმაოდ მაღალი" უწოდა და აღნიშნა, რომ ეს ახლა ვოლოდიმირ ზელენსკიზეა დამოკიდებული.