უკრაინის პრეზიდენტი, ვოლოდიმირ ზელენსკი ორშაბათს ვაშინგტონში აშშ-ს პრეზიდენტს, დონალდ ტრამპს შეხვდება. ამის შესახებ უკრაინის პრეზიდენტი, ტრამპთან სატელეფონო საუბრის შემდეგ, სოციალურ ქსელში წერს.

მისი თქმით, "მნიშვნელოვანია, რომ ამერიკის სიძლიერე გავლენას ახდენს სიტუაციაზე". ზელენსკი აღნიშნავს, რომ უკრაინა მხარს უჭერს "პრეზიდენტ ტრამპის წინადადებას უკრაინა-ამერიკა-რუსეთის სამმხრივ შეხვედრაზე".

"ხანგრძლივი, შინაარსიანი საუბარი პრეზიდენტ ტრამპთან ჯერ ერთი ერთში და შემდეგ ასევე ევროპელი ლიდერების მონაწილეობით. ჯამში, საათნახევარზე მეტი ვისაუბრე, დაახლოებით საათი — პრეზიდენტ ტრამპთან.

უკრაინა კიდევ ერთხელ ადასტურებს, რომ მზად არის მაქსიმალურად ეფექტურად იმუშაოს მშვიდობისთვის. პრეზიდენტმა ტრამპმა რუსეთის ლიდერთან შეხვედრის შესახებ, საუბრის ძირითად საკითხებზე, მოკლედ მომიყვა. მნიშვნელოვანია, რომ ამერიკის სიძლიერე გავლენას ახდენს სიტუაციაზე.

ჩვენ მხარს ვუჭერთ პრეზიდენტ ტრამპის წინადადებას უკრაინა-ამერიკა-რუსეთის სამმხრივ შეხვედრაზე. უკრაინა ხაზს უსვამს: საკვანძო საკითხების განხილვა შეიძლება ლიდერების დონეზე, სამმხრივი ფორმატი კი ამისთვის შესაფერისია.

ორშაბათს, ვაშინგტონში პრეზიდენტ ტრამპთან ვაპირებ, განვიხილო ყველა დეტალი მკვლელობებისა და ომის დასრულების შესახებ. მადლიერი ვარ ამ მოწვევისთვის.

ამერიკასთან უსაფრთხოების საიმედო გარანტიისთვის მნიშვნელოვანია, რომ ევროპელები ყველა ეტაპზე იყვნენ ჩართულები. განვიხილეთ ამერიკული მხარის პოზიტიური სიგნალები უკრაინის უსაფრთხოების უზრუნველყოფაში მონაწილეობის შესახებ. ჩვენ ვაგრძელებთ ჩვენი პოზიციების კოორდინირებას ყველა პარტნიორთან. მადლობა ყველას, ვინც გვეხმარება!", — წერს ზელენსკი.

პარასკევს, 15 აგვისტოს, რუსეთის მიერ უკრაინაში შეჭრის შემდეგ, ალასკაში აშშ-სა და რუსეთის პრეზიდენტებს შორის პირველი შეხვედრა გაიმართა. დონალდ ტრამპმა და ვლადიმერ პუტინმა მოლაპარაკებები ანკორიჯში, ელმენდორფ-რიჩარდსონის საჰაერო ბაზაზე გამართეს.

რუსეთის პრეზიდენტ ვლადიმერ პუტინთან შეხვედრის შემდეგ, აშშ-ის პრეზიდენტმა დონალდ ტრამპმა FoX News-თან განაცხადა, რომ დღეს "10-დან 10-ით" აფასებს.

ტრამპმა განაცხადა, რომ იწყება მზადება რუსეთისა და უკრაინის ხელმძღვანელების შეხვედრისთვის. მისივე თქმით, შეთანხმების მიღწევის ალბათობა "საკმაოდ მაღალი" უწოდა და აღნიშნა, რომ ეს ახლა ვოლოდიმირ ზელენსკიზეა დამოკიდებული.