კრისტინ ჰანას გახმაურებული წიგნის, ბულბულის, მიხედვით ფილმს იღებენ. ამერიკელი მწერლის ისტორიული ჟანრის რომანის ეკრანიზაციაში მთავარ როლებს დაკოტა და ელ ფენინგები ითამაშებენ. ეს პირველი შემთხვევა იქნება, როცა დები ფენინგები კინოსცენებში ერთად გამოჩნდებიან. აღსანიშნავია, რომ დაკოტა და ელი პროექტის პროდიუსერების როლსაც მოირგებენ ჰოლივუდის კიდევ ერთ ვარსკვლავთან, რიზ უიზერსპუნთან ერთად.

რაც შეეხება შემოქმედებითი გუნდის დანარჩენ ნაწილს, ფილმის სცენარისტი დანა სტივენსია, რეჟისორი კი ემის ორგზის ნომინანტი მაიკლ მორისი გახლავთ, რომელმაც სახელი ისეთ პოპულარულ სერიალებზე მუშაობით გაითქვა, როგორებიცაა House of Cards, Better Call Saul და 13 Reasons Why.

კრისტინ ჰანას ბულბული 2015 წელს გამოიცა და მაშინვე მიიქცია მკითხველების თუ კრიტიკოსების ყურადღება. რომანი გვიყვება მეორე მსოფლიო ომის პერიოდში მცხოვრებ დებზე, რომლებიც ნაცისტური გერმანიის მიერ ოკუპირებულ საფრანგეთში სარისკო გზებით ცდილობენ გადარჩენას. ჰანას ნაწარმოები 45 ენაზე ითარგმნა და მსოფლიოში 11 მილიონზე მეტ ეგზემპლარად გაიყიდა.

აღსანიშნავია, რომ ბულბულის ეკრანიზაციის უფლებაც რომანის გამოქვეყნებისთანავე გაიყიდა და ფილმზე მუშაობაც იმავე წელს დაიწყო, მაგრამ პროცესი გაიწელა, 2020 წელს კი, როცა გადაღებები უნდა დაწყებულიყო, პროექტი კოვიდპანდემიამ შეაჩერა. მას შემდეგ ფილმის გამოსვლის თარიღმა კიდევ რამდენჯერმე გადაიწია.

საბოლოოდ, ხანგრძლივი ლოდინის შემდეგ, მაყურებელი ბულბულს 2027 წლის 12 თებერვალს იხილავს.