ლეგენდარული როკ-ჯგუფი, Black Sabbath, კიდევ ერთხელ გაერთიანდა ოზი ოსბორნის საბოლო შოუსთვის, რომელიც შაბათს ბირმინგემში გაიმართა. კონცერტში მონაწილეობა სხვა როკის ლეგენდებმაც მიიღეს და შოუ ოსბორნის უკანასკნელად სანახავად მისული მსმენელისთვის დაუვიწყარ სანახაობად იქცა.

სტივენ ტაილერი, მეტალიკა, Guns N’ Roses, რონი ვუდი, Alice in Chains, Slayer, ფრედ დარსტი და სხვა შემსრულებლები წარდგნენ დაახლოებით 42 000 მსმენელის წინაშე. კონცერტი, რომელსაც "Back to the Beginning" (დაბრუნება დასაწყისში) ეწოდებოდა, ოზი ოსბორნთან გამოსამშვიდობებელი ღონისძიება იყო.

კონცერტზე წარდგენილმა მხარდამჭერმა არტისტებმა შეასრულეს როგორც Black Sabbath-ის ქავერები, ასევე საკუთარი სიმღერები.

Metallica-ს გამოსვლის შემდეგ, სცენაზე გამოჩნდა 76 წლის ოზი ოსბორნი და ხუთი სიმღერა შეასრულა. შემდეგ მას შეუერთდნენ მისი ყოფილი ჯგუფის, Black Sabbath-ის წევრები: ტონი იომი, ბილ ვარდი და გიზერ ბატლერი, რომლებმაც ერთად ოთხი სიმღერა შეასრულეს.

ოსბორნი, რომელიც პარკინსონის სინდრომითაა დაავადებული, შავი ტყავის სკამიდან მიმართავდა გულშემატკივრებს.

ბოლო სიმღერის დასრულების შემდეგ, ოზის ტორტი მიართვეს და საკონცერტო დარბაზის თავზე ფეიერვერკები გაისროლეს, რაც ემოციური საღამოს დასასრული იყო.

"ეს ჩვენი ბოლო სიმღერაა. თქვენმა მხარდაჭერამ საშუალება მოგვცა, საოცარი ცხოვრებით გვეცხოვრა. მადლობა მთელი გულით. მიყვარხართ," — მიმართა ოზიმ მაყურებლებს.

კონცერტი, რომელსაც Aquaman-ის ვარსკვლავი, ჯეისონ მომოა უძღვებოდა, მთლიანად გაიყიდა. კონცერტზე Black Sabbath-ის წევრები 20 წლის განმავლობაში პირველად წარდგნენ ერთად სცენაზე.

ჯეისონ მომოა კონცერტზე

ჯეისონ მომოა კონცერტზე

ფოტო: Getty Images

კონცერტიდან შემოსული თანხა გადაეცა სამ საქველმოქმედო ორგანიზაციას: Cure Parkinson’s-ს, Birmingham Children’s Hospital-სა და Acorn Children’s Hospice-ს.

კონცერტამდე, ოზის მეუღლემ და მენეჯერმა, შერონ ოსბორნმა გაამხილა, რომ კონცერტზე ერთ-ერთ ჯგუფს მონაწილეობის უფლება ჩამოართვა, რადგან მათ შოუდან ფინანსური სარგებლის მიღება სურდათ.

ოზი ოსბორნმა Black Sabbath ბირმინგემში 1968 წელს დააფუძნა და ჯგუფი მალე ერთ-ერთ ყველაზე წარმატებულ მეტალ-ბენდად იქცა ისტორიაში.