სომხეთის ხელისუფლებამ, 25 წლის სემენ სუბოტინი, რომელიც სტრატეგიულ სარაკეტო ძალებში, რადიოტელეფონისტად და მსროლელად მსახურობდა, რუსეთს არ გადასცა. სუბოტინმა უკრაინის წინააღმდეგ ომში მონაწილეობაზე უარი თქვა. ინფორმაციას ამის შესახებ Caliber.Az ავრცელებს.

როგორც აზერბაიჯანული მედია იუწყება, აღნიშნული ინფორმაცია ანონიმურმა ადამიანის უფლებადამცველებმა რუსულ მედიასაშუალება "ნოვაია გაზეტა იევროპას" მიაწოდეს.

ყოფილმა სამხედრო მოსამსახურემ რუსეთი 2024 წლის სექტემბერში დატოვა.

სომხეთში ის არალეგალური სტატუსით აღმოჩნდა, რადგან რუსეთის მიერ დეზერტირობის მუხლით ძებნაში იყო. სუბოტინმა სომხეთის პოლიციას სტატუსის ლეგალიზების თხოვნით მიმართა.

"ასეთ შემთხვევებში განსაზღვრული პროცედურა მოქმედებს: სომხეთის პოლიცია რუსულ მხარეს ატყობინებს, რომელიც ექსტრადიციისთვის საჭირო დოკუმენტებს ამზადებს. საბოლოო გადაწყვეტილებას ექსტრადიციაზე სომხეთის სასამართლო იღებს. სუბოტინი 72 საათით დააკავეს — ეს დრო ეძლევა რუსეთს, რათა აღკვეთის ღონისძიების განსაზღვრისთვის მასალები წარმოადგინოს. ამის ნაცვლად, დღეს რუსი სამხედროები დაკავების ცენტრში მივიდნენ, სადაც სუბოტინი იმყოფებოდა, და მისი გადაყვანა პროცედურის გვერდის ავლით სცადეს," — განაცხადეს აქტივისტებმა.

ადამიანის უფლებადამცველებმა პოლიციასა და პროკურატურას მიმართეს და გატაცების საფრთხის შესახებ განაცხადეს. 72 საათის გასვლის შემდეგ სომეხმა სამართალდამცველებმა სუბოტინი გაათავისუფლეს და ერებუნის პოლიციის განყოფილებაში გადაიყვანეს, სადაც მას ადვოკატი ელოდა. ამჟამად იგი თავისუფალია.