შსს-ს ცნობით, ქვემო ქართლის პოლიციამ საზღვრის უკანონოდ კვეთის, ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ფაქტებზე თურქეთის რესპუბლიკის 3 მოქალაქე დააკავა.

"დაკავებულები არიან: 1999 წელს დაბადებული ი.ჯ., 1980 წელს დაბადებული შ.ი. და თურქეთის ინტერპოლის მიერ ორი პირის განზრახ მკვლელობისათვის წითელი ცირკულარით ძებნილი 2000 წელს დაბადებული გ.ი.

გამოძიებით დადგინდა, რომ ი.ჯ.-მ და გ.ი.-მ საქართველოს სახელმწიფო საზღვარი სასაზღვრო კონტროლის გვერდის ავლით, უკანონოდ გადმოკვეთეს. სამართალდამცველებმა სამივე ბრალდებული თეთრიწყაროს მუნიციპალიტეტში, ავტომობილით გადაადგილებისას შეაჩერეს", — წერია შსს-ს მიერ გავრცელებულ განცხადებაში.

პოლიციამ ბრალდებულებისგან ნივთმტკიცებად ცეცხლსასროლი იარაღი და 13 ვაზნა ამოიღო. გამოძიება საქართველოს სისხლის სამართლის კოდექსის 344-ე , 25-236-ე და 236-ე მუხლებით მიმდინარეობს. დანაშაულები 11 წლამდე ვადით თავისუფლების აღკვეთას ითვალისწინებს.