ოცნების ხელისუფლების პრემიერმინისტრმა, ირაკლი კობახიძემ ჟურნალისტებთან საუბრისას ქართული ოცნების მიერ კომუნიკაციების კომისიაში შეტანილ სარჩელზე გააკეთა კომენტარი.

მისი თქმით, "ცენზურა არაფერ შუაშია", მრავალი წელია არსებული დადგენილი სტანდარტები, "უბრალოდ არ არსებობდა ამის აღსრულების მექანიზმები", "რამდენიმე თვის წინ პარლამენტმა გაწერა აღსრულების მექანიზმები და ამის საფუძველზე განხორციელდება მიმართვა შესაბამის ორგანოსადმი".

"ჯერ ერთი ცენზურა არაფერ შუაშია. რეალურად არის სტანდარტები დადგენილი მრავალი წელია ჩვენს კანონმდებლობაში. უბრალოდ არ არსებობდა ამის აღსრულების მექანიზმები. ის, რომ საინფორმაციო გამოშვება უნდა იყოს ობიექტური და ნეიტრალური ეს არის საერთაშორისო მედია სტანდარტი. ეს სტანდარტები საქართველოში მოქმედებდა ძალიან დიდი ხნის განმავლობაში, უბრალოდ არ იყო გათვალისწინებული აღსრულების მექანიზმები. რამდენიმე თვის წინ პარლამენტმა გაწერა აღსრულების მექანიზმები და ამის საფუძველზე განხორციელდება მიმართვა შესაბამის ორგანოსადმი. რა შუაშია ცენზურა.

ობიექტურობის სტანდარტების დაცვა ვერავითარ შემთხვევაში ვერ შეფასდება ცენზურად,. პირიქით იმისათვის, რომ სწორი კულტურა ჩამოყალიბდეს მედიაში საჭიროა დაცული იყო ობიექტურობის სტანდარტები. კულტურის უზრუნველყოფა არ არის ცენზურა. თქვენთვის ეს შეიძლება იყოს ცენზურა, მაგრამ აქ არის საუბარი იმაზე, რომ ყველამ უნდა იზრუნოს ჩვენს საზოგადოებაში კულტურის ჩამოყალიბებაზე და ჩვენ საზოგადოებაში და ქართულ მედიაში სწორი კულტურის ჩამოყალიბებაში", — თქვა კობახიძემ.

მისივე თქმით, "ეს კანონი თანაბრად ეხება ყველა ტელევიზიას". მისი თქმით, თუ „საინფორმაციო გამოშვებაში თუ გამოიყენება ისეთი ტერმინები, როგორიცაა "რადიკალური ოპოზიცია“, ამ ახალი კანონის მიხედვით, ეს ტერმინიც არ უნდა იყოს გამოყენებული".

"ეს კანონი თანაბრად ეხება ყველა ტელევიზიას. თუ ერთ მიმართულებით გამოიყენება კონკრეტული ტერმინები, მეორე მიმართულებითაც გამოიყენება კონკრეტული ტერმინები. საინფორმაციო გამოშვებაში თუ გამოიყენება ისეთი ტერმინები, როგორიცაა „რადიკალური ოპოზიცია“, ამ ახალი კანონის მიხედვით, ეს ტერმინიც არ უნდა იყოს გამოყენებული.

[...] ჩვენ სადაც გვაინტერესებდა, იქ გავაკეთეთ მიმართვა. როცა პარტია მიმართავს ვინმეს, მას სუბიექტური ინტერესი ამოძრავეს, რა თქმა უნდა. არის სხვა პარტიები, მათაც შეუძლია მიმართონ და ეს ხელს შეუწყობს კულტურის ჩამოყალიბებას. ნაცვლად იმისა, რომ კონკრეტულმა ოპოზიციურმა პარტიებმა ისაუბრონ ცენზურაზე, რაც ტყუილია., მათ ასევე უნდა შეიტანონ წვლილი შესაბამისი კულტურის ჩამოყალიბებაში. თუ მათ მიაჩნიათ, რომ კონკრეტული ტელევიზიები საკუთარი გამონათქვამებით არღვევენ ობიექტურობის სტანდარტებს, შეუძლიათ მათაც მიმართონ შესაბამის ორგანოებს",— თქვა კობახიძემ.