"გზის გადაკეტვისთვის სახდელად 5 000-ლარიანი ჯარიმა ან 15 დღემდე პატიმრობაა გათვალისწინებული და სახდელის შეფარდების უფლება შსს-ს აქვს, რაც 174 პრიმა მუხლის მე-5 ნაწილს გასაჩივრების ახალ წესს უქვემდებარებს," — ამის შესახებ ახალგაზრდა იურისტთა ასოციაციის თავმჯდომარე ნიკა სიმონიშვილი სოციალურ ქსელში წერს და ოცნების მიერ ადმინისტრაციულ სამართალდარღვევათა კოდექსში შეტანილ ცვლილებებს განმარტავს.

ნიკა სიმონიშვილის განცხადებით, შედგენილი ჯარიმები გზის გადაკეტვაზე პირდაპირ სასამართლოში გასაჩივრდება, შინაგან საქმეთა სამინისტროში გასაჩივრება აღარ მოხდება და საქმის ერთი ინსტანციით ნაკლებში გასაჩივრება იქნება შესაძლებელი.

მისი თქმით, ახალი ცვლილებებით, ჯარიმა ძალაში შევა და აღსრულება დაიწყება პირველ ინსტანციაში მიღებული გადაწყვეტილების შემდეგ და აპელაციაში გასაჩივრება არ შეაჩერებს მის მოქმედებას.

იურისტი აღნიშნავს, რომ ეს წესი შეეხება შსს-ში შედგენილ საჯარიმო ქვითრებს და ვინც სასამართლომ დააჯარიმა, მაგრამ ჯერ დადგენილება არ ჩაბარებია, ისევ ძველი წესი გამოიყენება და დადგენილების ჩაბარებიდან 7 დღის ვადაში უნდა გადაიხადონ ჯარიმა.

"ქართული ოცნების პარლამენტი გზის გადაკეტვაზე შედგენილი ჯარიმების გასაჩივრების და განხილვის წესსაც ცვლის. იმდენი საკითხი შემოიტანეს ბოლო ცვლილებებით, რომ ეს საკითხი თითქმის გამოგვრჩა.

კანონპროექტში წერია, რომ იმ სამართალდარღვევებზე, სადაც სახდელის სახით პატიმრობასთან ერთად სხვა სახდელიცაა გათვალისწინებული (მაგ. ჯარიმა) და ამ საქმის განხილვის და სახდელის შეფარდების უფლება შსს-ს აქვს, მაშინ დადგენილება გასაჩივრდება პირდაპირ სასამართლოში და ზემდგომ ორგანოში აღარ.

მარტივად რომ ავხსნა, გზის გადაკეტვისთვის სახდელად 5 000-ლარიანი ჯარიმა ან 15 დღემდე პატიმრობაა გათვალისწინებული და სახდელის შეფარდების უფლება შსს-ს აქვს, რაც 174 პრიმა მუხლის მე-5 ნაწილს გასაჩივრების ახალ წესს უქვემდებარებს.

კიდევ უფრო მარტივად რომ ვთქვა, ამის შემდეგ შედგენილი ჯარიმები გზის გადაკეტვაზე პირდაპირ სასამართლოში გასაჩივრდება, შსს-ში გასაჩივრების შესაძლებლობა აღარ იქნება და საქმის ერთი ინსტანციით ნაკლებში გასაჩივრება შეგვეძლება.

ყველაზე ცუდი ისაა, რომ ჯარიმა ძალაში შევა და აღსრულება დაიწყება პირველ ინსტანციაში მიღებული გადაწყვეტილების შემდეგ და აპელაციაში გასაჩივრება არ შეაჩერებს მის მოქმედებას. ამდენად, ჯარიმის გადახდა პირველი ინსტანციის დადგენილების ჩაბარებიდან 30 დღის ვადაში უნდა მოხდეს, რის შემდეგაც, იძულებითი აღსრულება შეიძლება დაიწყონ.

აქვე განვმარტავ, რომ აპელაცია ამ საჩივრებს ისედაც არ დაუშვებს და მალევე მოიშორებს საქმეებს თავიდან.

შსს-ში ვინც შეიტანეთ საჩივრები და ჯერ პასუხი არ მიგიღიათ, ეს წესი ამ საქმეებზეც გავრცელდება. შსს აღარ განიხილავს თქვენ საჩივარს და ყველა ეს საქმე გადაიგზავნება სასამართლოში, კანონის ამოქმედებიდან 10 დღის ვადაში.

აქვე კიდევ ერთხელ ვიტყვი, ეს წესი შეეხება შსს-ს შედგენილ საჯარიმო ქვითრებს და ვინც სასამართლომ დააჯარიმა, მაგრამ ჯერ დადგენილება არ ჩაბარებია, ისევ ძველი წესი გამოიყენება და დადგენილების ჩაბარებიდან 7 დღის ვადაში უნდა გადაიხადონ ჯარიმა" — წერს ნიკა სიმონიშვილი.

ინიციირებულ ცვლილებებს ოცნების პარლამენტი დაჩქარებული წესით განიხილავს. კანონპროექტი პირველი მოსმენით უკვე დაამტკიცეს.

ასევე იხილეთ: