ქართული ოცნება "ადმინისტრაციულ სამართალდარღვევათა კოდექსს" ამკაცრებს. კანონპროექტში შეტანილი ცვლილებებით მკაცრდება სასჯელი სამართალდამცავების დაუმორჩილებლობის, თანამდებობის პირის ან საჯარო მოსამსახურის შეურაცხყოფის, შეკრება-მანიფესტაციის ორგანიზებისა და ჩატარების წესის დარღვევისთვის. ცვლილებები ასევე შეეხება ქვეითად მოსიარულე პირებსა და სატრანსპორტო საშუალებების მძღოლებსაც.

რიგ შემთხვევებში ჯარიმა იცვლება ადმინისტრაციული პატიმრობით:

ოცნების პარლამენტის იურიდიულ საკითხთა კომიტეტის თავმჯდომარის პირველი მოადგილის, თორნიკე ჭეიშვილის განცხადებით, თუ პირი წვრილმანი ხულიგნობისთვის, სამართალდამცავი ორგანოს წარმომადგენლის კანონიერი მოთხოვნის დაუმორჩილებლობისთვის, სახელმწიფო-პოლიტიკურ თუ პოლიტიკური თანამდებობის პირის ან საჯარო მოსამსახურის შეურაცხყოფისთვის, ასევე შეკრების ან მანიფესტაციის ორგანიზებისა და ჩატარების წესის დარღვევისთვის დაკისრებულ ჯარიმას არ გადაიხდის, ქმედების განმეორებით ჩადენის შემთხვევაში, მას ადმინისტრაციული პატიმრობა შეეფარდება.

მისი თქმით, გარდა იმ ზოგადი გამონაკლისებისა, რაც "ადმინისტრაციულ სამართალდარღვევათა კოდექსითაა" გათვალისწინებული გამომრიცხავი გარემოებების სახით პატიმრობის გამოყენების დროს.

ადმინისტრაციული პასუხისმგებლობა მკაცრდება ქვეითად მოსიარულე პირებისთვის:

იზრდება ფულადი სანქცია ქვეითად მოსიარულეების მიერ "საგზაო მოძრაობის შესახებ" კანონის დარღვევისთვის და საგზაო მოძრაობის მარეგულირებელი სიგნალისადმი დაუმორჩილებლობისთვის, ასევე საგზაო ნიშნის ან საგზაო მონიშვნის მოთხოვნათა უგულებელყოფისთვის. აღნიშნული სამართალდარღვევა 10 ლარის ნაცვლად, გამოიწვევს პირის დაჯარიმებას 50 ლარით. 20 ლარიდან 100 ლარამდე იზრდება სანქცია აღნიშნული ქმედების განმეორებით ჩადენისთვის.

"ამ მუხლის პირველი ნაწილით გათვალისწინებული ქმედების ჩადენა ავტომაგისტრალზე, საერთაშორისო ან შიდასახელმწიფოებრივი მნიშვნელობის გზაზე, — გამოიწვევს დაჯარიმებას 100 ლარის ოდენობით.

ამ მუხლის მეოთხე ნაწილით გათვალისწინებული სამართალდარღვევის განმეორებით ჩადენა 1 წლის განმავლობაში, — გამოიწვევს დაჯარიმებას 200 ლარის ოდენობით" — აღნიშნულია კანონპროექტში.

მკაცრდება კანონი სატრანსპორტო საშუალებების მძღოლებისთვისაც:

ცვლილების თანახმად, ე.წ. დრიფტისთვის ადმინისტრაციული პასუხისმგებლობა დაეკისრება ყველა სახის სატრანსპორტო საშუალების მძღოლს.

"სატრანსპორტო საშუალების განზრახ მოცურება/მოსრიალება ან/და მოცურებით წრიული ბრუნვის განხორციელება (დრიფტი), გარდა საქართველოს კანონმდებლობით დადგენილი წესით ჩატარებულ პროფესიულ სპორტულ ღონისძიებაში მონაწილეობის შემთხვევისა, —გამოიწვევს დაჯარიმებას 300 ლარის ოდენობით" — წერია კანონპროექტში.

ასევე, ცვლილებების მიხედვით, თვითნებურად გადაკეთებულად ჩაითვლება, მათ შორის ისეთი სატრანსპორტო საშუალება, რომელსაც გადაკეთებული ექნება სატრანსპორტო საშუალების მაყუჩი. ამასთან, იზრდება ფულადი ჯარიმა იმ სატრანსპორტო საშუალების მართვისთვის, რომელიც თვითნებურად არის გადაკეთებული. კერძოდ, აღნიშნული ქმედება გამოიწვევს დაჯარიმებას 200 ლარის ოდენობით, ნაცვლად 100 ლარისა.

გარდა ამისა, დასახელებული სამართალდარღვევის ჩადენის შემთხვევაში, პოლიციელი უფლებამოსილი იქნება მძღოლი ჩამოაშოროს სატრანსპორტო საშუალების მართვას და სატრანსპორტო საშუალება გადაყვანილი იქნება სპეციალურ დაცულ სადგომზე. ასევე, აკრძალული იქნება იმ სატრანსპორტო საშუალების ექსპლუატაცია, რომელიც თვითნებურად არის გადაკეთებული.

პასუხისმგებლობა წესდება სატრანსპორტო საშუალებაზე, საგზაო მოძრაობის მონაწილის შეცდომაში შეყვანის მიზნით, საქართველოს კანონმდებლობით განსაზღვრული ფერისგან განსხვავებული ნებისმიერი სხვა ფერის ციმციმა სიგნალის დაყენებისთვის. აღნიშნული ქმედება გამოიწვევს დაჯარიმებას 2 000 ლარის ოდენობით, აგრეთვე ციმციმა სიგნალის კონფისკაციასა და სატრანსპორტო საშუალების მართვის მოწმობისთვის მინიჭებული ქულათა რაოდენობის შემცირებას 15 ქულით. დასჯადი იქნება ქმედების განმეორებით ჩადენა, რისთვისაც სანქციის სახით განისაზღვრება ჯარიმა 2 500 ლარის ოდენობით, აგრეთვე ციმციმა სიგნალის კონფისკაცია და სატრანსპორტო საშუალების მართვის მოწმობისთვის მინიჭებული ქულათა რაოდენობის 20 ქულით შემცირება.

"ამასთანავე, ადმინისტრაციული სამართალდარღვევის საქმის განხილვა და სახდელის
შეფარდება ადმინისტრაციული ორგანოს კომპეტენციაა, ასეთ შემთხვევაში ადმინისტრაციული ორგანოს მიერ მიღებული დადგენილება ჯარიმის დაკისრების თაობაზე არ საჩივრდება ზემდგომ ადმინისტრაციულ ორგანოში (ზემდგომ თანამდებობის პირთან) და საჩივრდება უშუალოდ სასამართლოში," — ვკითხულობთ კანონპროექტში.

ინიციირებულ ცვლილებებს პირველი მოსმენით უკვე დაუჭირა მხარი ოცნების პარლამენტის იურიდიულ საკითხთა კომიტეტმა. კანონპროექტი სრულად ნახეთ აქ.