შარლიზ ტერონმა თავის მეხუთე ყოველწლიური უბნის წვეულება გახსნა შაბათს საღამოს Universal Studios-ის ტერიტორიაზე. ღონისძიება ეძღვნებოდა მის მიერ დაარსებულ ორგანიზაციას Charlize Theron Africa Outreach Project, რომელიც აფრიკელი ახალგაზრდების ჯანმრთელობასა და უსაფრთხოებას უჭერს მხარს.

ღონისძიების დაწყებისას ტერონმა ხუმრობით განაცხადა, თუ რას ფიქრობდა ჯეფ ბეზოსსა და მის მსგავსებზე: "მგონი ერთადერთები ვართ, ვინც ბეზოსის ქორწილზე მოსაწვევი არ მიიღო," — უთხრა მან დამსწრეებს — "მაგრამ არაუშავს, იმიტომ რომ ისინი გოიმები არიან და ჩვენ — მაგარი ტიპები.“

მას შემდეგ, რაც ვარსკვლავმა ამ ერთი სიტყვით დაახასიათა Amazon-ის დამფუძნებელი და მისი მდიდრული ქორწილის სტუმრები ვენეციაში, მან მადლობა გადაუხადა თავის აუდიტორიას:

"განსაკუთრებული მადლობა იმათ, ვინც მოიცალა და აქ მოვიდა, როცა ისეთი შეგრძნებაა, თითქოს მთელი მსოფლიო იწვის — იმიტომ, რომ მართლა იწვის.“

"აქ, ლოს-ანჯელესში, ამერიკაში და მთელ მსოფლიოში, უკან მივდივართ ძალიან სწრაფად,“ — განაგრძო ტერონმა. "მიგრაციის პოლიტიკამ ოჯახების ცხოვრება დაანგრია და არა კრიმინალების. ქალების უფლებები დღითი დღე ვიწროვდება; ქვიარ და ტრანს ადამიანების არსებობას საფრთხე ემუქრება; გენდერული ძალადობა კი იზრდება. ეს უბრალოდ პოლიტიკა არ არის — ეს უკვე პირადულია."

როგორც The Hollywood Reporter აღნიშნავს, როცა აუდიტორიამ ტაში დაუკრა, ტერონმა დაამატა: "ჰო, მაგათი დედაც!"

2024 წლის იანვარში ბეზოსმა საჯაროდ დაუჭირა მხარი ტრამპის საპრეზიდენტო კამპანიას, MAGA-ს (Make America Great Again). მილიარდერმა დონალდ ტრამპის ინაუგურაციაზე განსაკუთრებული ადგილები დაიკავა ისეთ ტექნოლოგიურ ლიდერებთან ერთად, როგორიცაა მარკ ზაკერბერგი (Facebook), ტიმ კუკი (Apple) და ილონ მასკი (Tesla).

ბეზოსი იმდენად მეგობრულად არის განწყობილი ტრამპის ოჯახთან, რომ ტრამპის უფროსი ქალიშვილი, ივანკა ტრამპი, თავის ქორწილშიც დაპატიჟა, რომლის ღირებულებამაც Forbes-ის მიხედვით დაახლოებით $25 მილიონი შეადგინა. სტუმრებს შორის იყვნენ ოპრა უინფრი, გეილ კინგი, ტომ ბრეიდი, ორლანდო ბლუმი და კარდაშიანების ოჯახი.

მიუხედავად იმისა, რომ ბეზოსმა და მისმა მეუღლემ, ლორენ სანჩესმა, ქორწილის შემდეგ ვენეციაში ქველმოქმედებისთვის თანხის გადარიცხვის პირობა დადეს, ადგილობრივმა აქტივისტურმა ჯგუფებმა, მათ შორის Greenpeace-მა, გრანდიოზული ქორწილი გააპროტესტეს. კრიტიკოსები ამტკიცებდნენ, რომ წყვილი ვენეციას — ქალაქს, რომელიც უკვე იტანჯება ზედმეტი ტურიზმისგან, მზარდი საცხოვრებლის ფასებისგან და კლიმატური საფრთხეებისგან — უბრალოდ გამოიყენეს.

თუმცა, ტრამპისგან განსხვავებით, ტერონს აშკარად არ ჰგონია, რომ პროტესტის მონაწილეები "საშინლები" არიან. მსახიობმა აღნიშნა, რომ პრეზიდენტის პოლიტიკის საწინააღმდეგო მოძრაობაში "იმედის სხივი" ჩანს.

"ძალა იმაშია, როცა ვდგებით, ვერთიანდებით, ვაპროტესტებთ, ვუვლით ერთმანეთს, ვიღებთ მონაწილეობას არჩევნებში და არ ვეგუებით იმ აზრს, რომ ეს არის ახალი ნორმა," — განაცხადა მან. "წინააღმდეგობის, სამართლიანობის და ზრუნვის სული — აი, ეს დგას CTAOP-ის (Charlize Theron Africa Outreach Project) მუშაობის უკან."

და ბოლოს ტერონმა დაამატა: "მიუხედავად იმისა, რომ ჩვენი მთავარი ფოკუსი სამხრეთ აფრიკის ახალგაზრდებზეა, სინამდვილეში დღეს ვსაუბრობთ იმაზე, რომ ყოველი სიცოცხლე უნდა იყოს დაფასებული."