დადგა ზაფხული და დიდებმა თუ პატარებმა დავიწყეთ იმაზე ზრუნვა და ფიქრი, რა უნდა წავიკითხოთ?.. ზაფხულს თან ახლავს დასვენება, არდადეგები, გართობა, ბუნება და რაც მთავარია, ბევრი ახალი მოგონება თუ თავგადასავალი. სწორედ ასეთი დღეებისთვის განკუთვნილი წიგნები დაწერა ფრენკ ბაუმმა და შექმნა ოზის საოცარი სამყარო.

რაზეა წიგნები? ახალ მკითხველებს ყოველთვის სწორედ ეს აინტერესებთ. წიგნები მეგობრობაზეა, არდანებებასა და ნებისმიერი გასაჭირიდან მარტივად თავის დაღწევაზე, გამჭრიახობასა და სილაღეზე, რაც მთავარია, უპირობო სიყვარულზე, მუდმივ ზრუნვასა და ერთმანეთის დახმარებაზე.

რა ასაკის მკითხველისთვისაა? გინდ დაიჯერეთ, გინდ — არა, მაგრამ ოზის სამყარო თითქმის ყველა ასაკის მკითხველს მოეწონება. პატარები თავად ჯერ ვერ კითხულობენ, მაგრამ სათავგადასავლო ამბები ნუსხავთ? წაუკითხეთ ოზი! სკოლის ასაკის ბავშვებს საინტერესო წიგნები სჭირდებათ? წააკითხეთ ოზი! უფროსებს მოგბეზრდათ, ე.წ. საუფროსო წიგნები და რაიმე საყვარელი, გასართობი და ცოტა გულის ამაჩუყებელი ნარატივი გსურთ? წაიკითხეთ ოზი!

რატომ ოზი? იმ თაობის მკითხველებს აუცილებლად გემახსოვრებათ სხვადასხვა ფილმიდან, მუსიკალური კლიპიდან თუ უბრალოდ პლაკატებიდან საყვარელი გოგონა, პატარა ძაღლით და განუყრელი მეგობრებით. ესენი სწორედ ოზის სამყაროს პერსონაჟები არიან — დოროთი, ტოტო, საფრთხობელა, ტყეკაფია, თავად ჯადოქარი ოზი და ყვითელი ბილიკი, რომელიც ზურმუხტქალაქისკენ მიუძღვება მეგობრებს. თუ ოზის წიგნები წაკითხული არ გაქვთ, მისი წაკითხვისას აღმოაჩენთ, რამხელა გავლენას ახდენს ეს საოცარი სივრცე სხვადასხვა შემოქმედებით სფეროზე.

მე-20 საუკუნის დასაწყისში ფრენკ ბაუმმა მოახერხა და შექმნა სამყარო, რომელმაც უკვე საუკუნეზე მეტია უამრავ ადამიანს აჩუქა საოცარი მოგონებები, წიგნების შთაგონებით შეიქმნა ფილმები, პერსონაჟები და სიმღერებიც კი.

ქარჩხაძის გამომცემლობის მიერ გამოცემულ 5 წიგნში სიუჟეტი ვითარდება ოზის სამყაროს სხვადასხვა, მაგრამ უმეტესად ნაცნობი პერსონაჟების გარშემო. დოროთი მოუსვენარი გოგონაა, უამრავი თავგადასავალი გადახდენია, თანაც სულ ახალ-ახალ მეგობრებს იძენს, მაგრამ არც ძველები ავიწყდება.

რატომ კომპლექტი? ქარჩხაძის გამომცემლობის მეშვეობით, ოზის სამყაროს ხუთი წიგნი ითარგმნა ქართულად. ხუთივე წიგნი განსხვავებულია, მაგრამ ხუთივე ერთი სამყაროს სხვადასხვა განზომილებაა. დოროთი მუდამ მოგზაურობს, ახალ-ახალი ქვეყნის აღმოჩენისას თავისთავად ემატება სულ ახალი მეგობრები, თანამოგზაურები. წიგნების კომპლექტით, თან დიდი ფასდაკლებით შეძენის შემთხვევაში, შეგეძლებათ დატკბეთ დოროთის მოგზაურობით, უკეთ გაიცნოთ მუდმივმოქმედი პერსონაჟები, მათი ხასიათი და დაინახოთ ერთმანეთისადმი ზრუნვა.