ქართული ოცნების პრემიერმინისტრმა, ირაკლი კობახიძემ ევროკავშირის მიერ დიპლომატიური პასპორტებთან მიმართებით დაწესებულ სანქციებს "სამარცხვინო გადაწყვეტილება" უწოდა. ამის შესახებ მან ჟურნალისტებთან საუბრისას განაცხადა.

"ეს შეზღუდვები მოქმედებს ევროკავშირის საერთო გადაწყვეტილებით დიპლომატიურ პასპორტებთან მიმართებით. თუმცა ჩვენ ჩვეულებრივად ვიღებთ ვიზებს, ვიზით ვიყავი წასული ერთ-ერთ ქვეყანაში. არანაირი პრობლემა აქ არ არის. ეს არის აბსოლუტურად სამარცხვინო გადაწყვეტილება, მაგრამ ეს მათი უფლებაა", — განაცხადა კობახიძემ.

ცნობისთვის, ევროკავშირის წევრი ქვეყნების ელჩებმა ქართული დიპლომატიური და სამსახურებრივი პასპორტებისთვის უვიზო რეჟიმის შეჩერებას მხარი 24 იანვარს დაუჭირეს და შეზღუდვა ოფიციალურად ბრიუსელში 27 იანვარს გაფორმდა. წინადადებაზე ევროკომისიამ იმუშავა, სამუშო დოკუმენტი 23 იანვრითაა დათარიღებული.