ვენეციის კომისიამ საქართველოს საკონსტიტუციო რეფორმაზე წინასწარი დასკვნა გამოაქვეყნა. წერილში ნათქვამია, რომ ვენეციის კომისია კიდევ ერთხელ ადასტურებს კონსტიტუციის პროექტის მიმართ საკუთარ დადებით შეფასებას, თუმცა კიდევ ერთხელ ხაზს უსვამს, რომ საკონსტიტუციო რეფორმა ფართო კონსენსუსის შედეგად უნდა შედგეს.

მათი თქმით, ძირითადი უთანხმოება ეხება პროპორციული სისტემის ამოქმედების გადადებას 2024 წლამდე. ვენეციის კომისია ამას უწოდებს "უდაოდ ძალიან სამწუხაროს", ვინაიდან, პროპორციული სისტემის პასაჟი რეფორმის "ყველაზე მნიშვნელოვანი ასპექტია".

კომისია წერს, რომ საპარლამენტო უმრავლესობის მზადყოფნა, რომელიც მათ 2017 წლის 20 სექტემბრის წერილში გამოთქვეს და რომელიც ეხება პარტიული ბლოკების დაშვებას, 2020 წლის არჩევნებზე ბარიერის სამ პროცენტამდე დაწევას, მისასალმებელია.

კომისიის წერილში წერია, რომ ახალი ბონუსური სისტემა, ასევე უთანხმოების საგანია ოპოზიციური პარტიებისთვისა და სამოქალაქო საზოგადოებისთვის. ამასთან, ვენეციის კომისია მიესალმება საპარლამენტო უმრავლესობის მზადყოფნას, გადავიდეს ბონუს სისტემიდან პროპორციული განაწილების სისტემაზე იმ პარტიებისთვის, რომლებიც 5 პროცენტიან ბარიერს გადალახავენ. მათივე შეფასებით, ასეთი სისტემა ხელს შეუწყობს პლურალიზმს პარლამენტში და სრულად შეესაბამება ევროპულ სტანდარტებს. ვენეციის კომისია მიიჩნევს, რომ აღნიშნული სისტემა დაუყოვნებლივ უნდა ამოქმედდეს.