დეიზი ედგარ-ჯონსი ითამაშებს ჯეინ ოსტინის კლასიკური რომანის, გრძნობა და გონების ახალ ეკრანიზაციაში, რომელსაც სტუდია Focus Features აწარმოებს. ფილმს რეჟისორი ჯორჯია ოკლი (ლურჯი ჯინი) გადაიღებს, ფილმზე ასევე მუშაობს Working Title Films და November Pictures.

გრძნობა და გონება, რომელიც პირველად 1811 წელს გამოქვეყნდა "ერთი ქალბატონის" ავტორობით, ჯეინ ოსტინის პირველი რომანია. მოგვიანებით მან შექმნა კლასიკად ქცეული ნაწარმოებები — სიამაყე და ცრურწმენა, ემა და დარწმუნება.

ედგარ-ჯონსმა სიახლე ინსტაგრამზე გაავრცელა, სადაც რომანთან ერთად გადაღებული ფოტო გამოაქვეყნა. 27 წლის ბრიტანელი მსახიობი საზოგადოებამ 2020 წელს Hulu-ს რომანტიკული დრამით გაიცნო — ნორმალური ადამიანები, სადაც მას პარტნიორობას პოლ მესკალი უწევდა.

ფოტო: IG

რომანი მოგვითხრობს დებზე — ელინორ და მარიან დეშვუდებზე — რომლებიც იძულებული ხდებიან დატოვონ თავიანთი ოჯახური კარ-მიდამო სასექსში და გადალახონ ფინანსური თუ სხვა სირთულეები. ელინორის როლს დეიზი ედგარ-ჯონსი ითამაშებს, ხოლო მარიანის როლის შემსრულებელი ჯერჯერობით უცნობია.

გრძნობა და გონება, 1995 წლის ეკრანიზაცია

გრძნობა და გონება, 1995 წლის ეკრანიზაცია

გრძნობა და გონება ეკრანზე უკვე არაერთხელ გაცოცხლდა — მათ შორის ყველაზე ცნობილი ანგ ლის 1995 წლის ფილმია, რომელშიც ელინორის როლს ემა ტომფსონი, ხოლო მარიანს ქეით უინსლეტი ასრულებდნენ. Focus Features-ის მხარდაჭერით ასევე გადაღებულია ოსტინის ორი სხვა ეკრანიზაცია: 2005 წლის სიამაყე და ცრურწმენა (კირა ნაითლი და მეთიუ მაკფედიენი) და 2020 წლის ემა, რომელშიც მთავარი როლი ანია ტეილორ-ჯოიმ შეასრულა.