პარლამენტის ვებგვერდზე სახელმწიფო უსაფრთხოებს სამსახურის (სუს) 2024 წლის ანგარიში გამოქვეყნდა.

უწყების 66-გვერდიან ანგარიშში საუბარია უცხო ძალაზე, უცხო ქვეყნების სპეციალური სამსახურებზე, დეზინფორმაციაზე, პროპაგანდაზე და ჰიბრიდული ომზე. ანგარიშს ხელს ქართული ოცნების ხელისუფლების სახელმწიფო უსაფრთხოებს სამსახურის ხელმძღვანელი, ანრი ოხანაშვილი აწერს. დოკუმენტში საუბარი, ძირითადად, ოპოზიციის, მედიის და არასამთავრობო სექტორის დასავლეთთან საეჭვო კავშირებზეა.

"უცხო ქვეყნების სპეციალური სამსახურები, ასევე ცალკეული შიდა და გარე აქტორები ე.წ. ჰიბრიდული ომის ინსტრუმენტების გამოყენებით ცდილობდნენ, ქვეყანაში მიმდინარე პოლიტიკურ და ეკონომიკურ პროცესებზე გავლენის მოხდენას, იყო ხელისუფლების ძალადობრივი გზით შეცვლის მცდელობები. მათ მიერ აქტიურად გამოიყენებოდა დეზინფორმაციული და პროპაგანდისტული საინფორმაციო კამპანიები, რომელშიც, მათ შორის, ჩართული იყვნენ დასავლური ქვეყნებისა და ინსტიტუტების წარმომადგენლები, რამაც ცალკეული ქვეყნის სპეციალურ სამსახურებს გაუადვილა საქართველოში ანტიდასავლური კამპანიის წარმოების შესაძლებლობები.

პირთა გარკვეული ჯგუფების მოქმედებები იმართებოდა უცხო ქვეყნებიდან მომდინარე დაფინანსებით, საპარლამენტო და არასაპარლამენტო კონკრეტული პოლიტიკური პარტიების ლიდერების და არასამთავრობო ორგანიზაციების ხელმძღვანელების მიერ," — ნათქვამია ანგარიშში.

სუს-ის ანგარიშში ვკითხულობთ, რომ პროევროპულ და რუსული კანონის საწინააღმდეგო აქციებზე ზემოხსენებული "უცხო ძალის" წარმომადგენლები და საქართველოში მყოფი ჯგუფები სახელმწიფო გადატრიალებას და ხელისუფლების "ძალადობრივი გზით" შეცვლას გეგმავდა. უწყების აზრით, ამ "დანაშაულებრივ ქმედებებში უკრაინაში მებრძოლი ქართველების კონკრეტული ნაწილიც იყო ჩართული — "განიხილებოდა მმართველი ძალის თანამდებობის პირების ლიკვიდაციის გეგმები".

"საანგარიშო პერიოდში საქართველოს ტერიტორიასა და მის ფარგლებს გარეთ მოქმედ პირთა გარკვეული ჯგუფი, სხვადასხვა საბაბით (მათ შორის "უცხოური გავლენის გამჭვირვალობის შესახებ კანონის" მიღება, საპარლამენტო არჩევნების "გაყალბება"), საქართველოში გეგმავდა სამოქალაქო არეულობის და დესტაბილიზაციის პროვოცირებას, რომლის საბოლოო მიზანი ხელისუფლების ძალადობრივი გზით შეცვლა იყო.

პირთა გარკვეული ჯგუფების მოქმედებები იმართებოდა უცხო ქვეყნებიდან მომდინარე დაფინანსებით, საპარლამენტო და არასაპარლამენტო კონკრეტული პოლიტიკური პარტიების ლიდერების და არასამთავრობო ორგანიზაციათა ხელმძღვანელების მიერ.

სხვადასხვა პერიოდში დანაშაულებრივ გეგმებში აქტიურად იყვნენ ჩართულნი ქვეყნის გარეთ მყოფი საქართველოს მოქალაქეები, კერძოდ, უკრაინაში მებრძოლი ქართველების კონკრეტული ნაწილი, რომლებიც აცხადებდნენ მზადყოფნას ჩამოსულიყვნენ საქართველოში და აქტიური მონაწილეობა მიეღოთ პოლიციის წინააღმდეგ დაგეგმილ ძალადობაში, რასაც მოჰყვებოდა სიტუაციის უკიდურესი დაძაბვა. მათ შორის განიხილებოდა მმართველი ძალის თანამდებობის პირების ლიკვიდაციის გეგმები," — ვკითხულობთ ანგარიშში.

უწყების ანგარიშში საპროტესტო გამოსვლები შეფასებულია, როგორც "მაიდანიზაციის" მცდელობა.

საპროტესტო გამოსვლების ორგანიზატორების მიზანს მიმდინარე პროცესების ე.წ. "მაიდანიზაცია" წარმოადგენდა. იგეგმებოდა თბილისის სატრანსპორტო კვანძების პარალიზება, სამთავრობო დაწესებულებებსა და სტრატეგიული დანიშნულების ობიექტებთან მისასვლელი გზების, სამართალდამცავი ორგანოების დისლოკაციის ბაზების ბლოკირება, ცენტრალურ გამზირებზე ე.წ. კარვების ქალაქების მოწყობა.

საპროტესტო მუხტისა და რადიკალიზმის გასაზრდელად დაგეგმილი იყო სამართალდამცავი ორგანოების თანამშრომელთა პროვოცირება დემონსტრანტებთან დასაპირისპირებლად, რასაც უნდა მოჰყოლოდა მსხვერპლი. ამ მიზნით ცალკეული ახალგაზრდული ჯგუფების მიერ გამოიყენებოდა პიროტექნიკა და ე.წ. "მოლოტოვის კოქტეილები," — აღნიშნულია ანგარიშში.

"მაიდანიზაციის" შემდეგ, უწყება მიმდინარე საპროტესტო აქციებს "ფერადი რევოლუციის" მცდელობას უწოდებს. სუს-ის აზრით, რევოლუციის ფარგლებში პარლამენტის ტერიტორიაზე სიტუაციის დაძაბვა იგეგმებოდა, რასაც მსხვერპლი მოჰყვებოდა და ეს ქართულ ოცნებას დაჰბრალდებოდა.

"ამ მიზნით, განიხილებოდა საქართველოს პარლამენტის მიმდებარე ტერიტორიაზე სიტუაციის მაქსიმალურად დაძაბვა, რასაც უნდა მოჰყოლოდა მსხვერპლი და მასზე პასუხისმგებლობა დაეკისრებოდა ხელისუფლებას.

საპროტესტო აქციის ორგანიზატორების აგრესიის განსაკუთრებულ სამიზნეს წარმოადგენდნენ სამართალდამცავი ორგანოს თანამშრომლები. მათი დემორალიზების და პროვოცირების მიზნით გამოიყენებოდა ე.წ. "ფერადი რევოლუციების“ მოწყობასთან დაკავშირებული ისეთი მეთოდები, როგორიცაა მათ მიმართ მუქარა, მოსყიდვა, საპროტესტო აქციის მონაწილეთა მხარეს მათი გადასვლის ინსცენირება, რაც, საბოლოო ჯამში, მიზნად ისახავდა სახელმწიფო სტრუქტურების ჩამოშლის განცდის შექმნას," — აღნიშნულია ანგარიშში.

უწყების ანგარიშში ასევე საუბარია მედიის წარმომადგენელზე, რომელზეც "დაფიქსირდა კავშირი უცხო ქვეყნების ოფიციალურ პირებთან და სავარაუდოდ, სპეციალური სამსახურების წარმომადგენლებთან, რომლებისგანაც დაფინანსებას და მითითებებს იღებდნენ, ასევე აწვდიდნენ ინფორმაციას დაინტერესების საკითხებზე".

"საანგარიშო პერიოდში, გამოვლინდა უცხო ქვეყნების სპეციალური სამსახურების მხრიდან საქართველოში ვიზიტად მყოფი პირების გამოყენების მცდელობები. დაფიქსირდა უცხო ქვეყნების მოქალაქეთა მხრიდან საქართველოს ტერიტორიაზე საეჭვო საქმიანობის განხორციელების ფაქტები, რაც გამოიხატა GPS კოორდინატების დადგენაში, დრონებით ფოტო და ვიდეოგადაღებებში. აღნიშნული კატეგორიის ზოგიერთი პირის მიმართ გატარდა კანონით გათვალისწინებული ღონისძიებები, მათ შორის ამოქმედდა სასაზღვრო კონტროლის მექანიზმი," — ნათქვამია ანგარიშში.

ანგარიშის მიხედვით, სუს-ის კონტრდაზვერვითი საქმიანობის შედეგად, კონტრდაზვერვის დეპარტამენტის მიერ გამოძიება სისხლის სამართლის 8 საქმეზე დაიწყო — კონკრეტული შედეგები ჯერ-ჯერობით უცნობია.

აღსანიშნავია, რომ დოკუმენტში, რომელიც პარლამენტს უკვე გადაეგზავნა, კონკრეტული ფაქტები მოყვანილი არ არის.