გერმანიის მომავალი კანცლერი ფრიდრიხ მერცი თავისი პირველი საგარეო ვიზიტის ფარგლებში, სავარაუდოდ, უკრაინას ეწვევა. ამის შესახებ გერმანული მედია წერს.

Welt წერს, რომ სუმიზე რუსული სარაკეტო თავდასხმის შემდეგ, რომლის შედეგადაც 34 ადამიანი დაიღუპა, დონალდ ტრამპმა შეშფოთება გამოხატა. ფრიდრიხ მერცმა ეს "სამხედრო დანაშაულად" შეაფასა და, როგორც ჩანს, კიევში "ნების კოალიციის" სამიტზე დასასწრებად გამგზავრებას აპირებს.

Politico-ს ცნობით, მერცს თუ დროულად აირჩევენ, ახლად არჩეული კანცლერი დაუყოვნებლივ უკრაინაში გამგზავრებას გეგმავს, სადაც პრეზიდენტმა ვოლოდიმირ ზელენსკიმ სახელმწიფოებისა და მთავრობების მეთაურები 9 მაისს "ნების კოალიციის" სამიტზე მიიწვია.

"9 მაისს, ჩვენ გვსურს ჩავატაროთ "ნების კოალიციის" შეხვედრა სახელმწიფოებისა და მთავრობების მეთაურების დონეზე, პრეზიდენტ ზელენსკის მონაწილეობით, უკრაინის უსაფრთხოების გარანტიების დასადგენად", — განაცხადა უკრაინის საგარეო საქმეთა მინისტრმა ანდრეი სიბიჰამ.

Politico ბერლინსა და ბრიუსელში ინფორმირებულ წყაროებზე დაყრდნობით იუწყება, რომ მერცის მაისის დასაწყისში უკრაინაში შესაძლო ვიზიტი იგეგმება. მერცის გარდა, ღონისძიებას სხვა მაღალი თანამდებობის პირებიც დაესწრებიან, როგორიცაა საფრანგეთის პრეზიდენტი ემანუელ მაკრონი და პოლონეთის პრემიერმინისტრი დონალდ ტუსკი.

კვირას, 13 აპრილს რუსეთი აღმოსავლეთ უკრაინის ქალაქ სუმის დაესხა თავს, რის შედეგადაც სულ მცირე 34 ადამიანი დაიღუპა. მერცმა ARD-ისთან განაცხადა, რომ ეს "ცხადია, სერიოზული ომის დანაშაულია". თავდასხმების ორი ტალღა მოხდა, მეორე „მაშინ, როდესაც ჰუმანიტარული დახმარების მუშაკები ცდილობდნენ დაზარალებულებზე ზრუნვას. ეს ვერაგობის პიკია“. მისი თქმით, გულუბრყვილობაა პუტინთან მოლაპარაკებები: "აი, როგორ ექცევა პუტინი მათ, ვინც მას ცეცხლის შეწყვეტაზე ესაუბრება", — განაცხადა მერცმა.