"ჩვენმა მთელმა ხელმძღვანელობამ, პრეზიდენტმა ტრამპმა და მდივანმა რუბიომ საჯაროდ ნათლად განაცხადეს, თუ რა დევს სასწორზე. სხვა არაფერია განსახილველი, სანამ სროლა და მკვლელობები არ შეწყდება", — ამის შესახებ აშშ-ის სახელმწიფო დეპარტამენტის პრესსპიკერმა, ტემი ბრიუსმა რუსეთ-უკრაინას შორის ცეცხლის შეწყვეტის შეთანხმებასთან დაკავშირებით დასმულ კითხვაზე საპასუხოდ განაცხადა.

ჟურნალისტმა ბრიუსს შეახსენა, რომ ერთი თვე გავიდა მას შემდეგ, რაც უკრაინამ აშშ-სთან მოლაპარაკების შემდეგ ხელი მოაწერა ცეცხლის შეწყვეტის შესახებ შეთანხმებას. რუსეთი კი პროცესებს ამ დრომდე აჭიანურებს და რუსული მხარე კიევზე თავდასხმას აგრძელებს.

"ვფიქრობ, ყველას ესმის, რომ პრეზიდენტი ტრამპი ამაშია ჩართული. ჩვენ გვყავს მსოფლიოში საუკეთესო დიპლომატები, რა თქმა უნდა, მდივანი რუბიოს ხელმძღვანელობით. ჩვენმა მთელმა ხელმძღვანელობამ, განსაკუთრებით პრეზიდენტმა ტრამპმა და მდივანმა რუბიომ საჯაროდ ნათლად განაცხადეს, თუ რა დევს სასწორზე. ეს არის დინამიკა, რომელიც სამხედრო გზით არ მოგვარდება. ეს არის ხორცსაკეპი მანქანა. სხვა არაფერია განსახილველი, სანამ სროლა და მკვლელობები არ შეწყდება.

მდივანმა რუბიომ ნატოში გამართულ პრესკონფერენციაზე ნათლად განაცხადა, რომ რამდენიმე კვირაში გავიგებთ, რამდენად სერიოზულადაა განწყობილი რუსეთი. ვფიქრობ, რუსეთმა ეს ნამდვილად სერიოზულად უნდა მიიღოს და ჩვენ ამას განვიხილავთ. ეს არ გაგრძელდება ექვსი თვის, ერთი წლის განმავლობაში. პრეზიდენტმა ასევე ნათლად განაცხადა, რომ ჩვენ გვინდა დიპლომატია. თუმცა, ფაქტია, რომ ჩვენ ვაკვირდებით და ვაფასებთ ამ პროცესის გაგრძელებას", — განაცხადა ბრიუსმა.